CBI ડિરેક્ટર પ્રવીણ સૂદનો કાર્યકાળ લંબાવાયો, વડાપ્રધાન-મુખ્ય ન્યાયાધીશની બેઠકમાં લેવાયો નિર્ણય

CBI Director Praveen Sood: કેન્દ્ર સરકારે સેન્ટ્રલ બ્યુરો ઓફ ઇન્વેસ્ટિગેશન (CBI)ના ડિરેક્ટર પ્રવીણ સૂદનો કાર્યકાળ લંબાવવાનો નિર્ણય લીધો છે. કેબિનેટની નિમણૂક સમિતિ(ACC)એ 24 મે, 2026થી વધુ એક વર્ષ માટે પ્રવીણ સૂદનો કાર્યકાળ લંબાવવાની મંજૂરી આપી છે. આ આદેશ 13 મે, 2026 ના રોજ જારી કરવામાં આવ્યો છે. પસંદગી સમિતિની ભલામણોના આધારે પ્રવીણ સૂદનો કાર્યકાળ લંબાવવામાં આવ્યો છે. ગત મંગળવારે(12 મે) PMO ખાતે નવા CBI ડિરેક્ટરની નિયુક્તિ માટે બેઠક મળી હતી. આ બેઠકમાં મુખ્ય ન્યાયાધીશ અને વિપક્ષાના નેતા રાહુલ ગાંધી પણ સામેલ હતા. 

મે 2027 સુધી કાર્યભાર સંભાળશે

બુધવારે(13) કેન્દ્ર સરકારે ફરી એકવાર CBI ડિરેક્ટર પ્રવીણ સૂદનો કાર્યકાળ એક વર્ષ માટે લંબાવ્યો. સૂદે 25 મે, 2023ના રોજ બે વર્ષના કાર્યકાળ માટે CBI ડિરેક્ટર તરીકેનો કાર્યભાર સંભાળ્યો હતો. આ પહેલા તેમને મે 2025માં એક વર્ષનો સેવા વિસ્તરણ પણ આપવામાં આવ્યું હતું. આમ હવે તેઓ આગામી મે 2027 સુધી આ પદ પર રહેશે.

વડાપ્રધાન મોદીની અધ્યક્ષતામાં મળેલી બેઠકમાં લેવાયો નિર્ણય 

સરકાર દ્વારા જારી કરાયેલા એક નિવેદન અનુસાર, મંગળવારે(12) વડાપ્રધાન નરેન્દ્ર મોદીની અધ્યક્ષતામાં યોજાયેલી પસંદગી સમિતિની બેઠક દરમિયાન પ્રવીણ સૂદનો કાર્યકાળ વધારવાનો નિર્ણય લેવામાં આવ્યો હતો. સમિતિમાં ભારતના મુખ્ય ન્યાયાધીશ સૂર્યકાંત અને લોકસભામાં વિરોધ પક્ષના નેતા રાહુલ ગાંધી પણ સામેલ હતા. પસંદગી સમિતિની ભલામણોના આધારે, કેબિનેટની નિમણૂક સમિતિ(ACC)એ સૂદના કાર્યકાળમાં એક વર્ષનો વધારો કરવાની મંજૂરી આપી છે. 

પ્રવીણ સૂદે અનેક હાઇ-પ્રોફાઇલ કેસ સંભાળ્યા

પ્રવીણ સૂદ કર્ણાટક કેડરના 1986 બેચના ભારતીય પોલીસ સેવા(IPS) અધિકારી છે. સેન્ટ્રલ બ્યુરો ઓફ ઇન્વેસ્ટિગેશન(CBI)ના ડિરેક્ટર તરીકે નિમણૂક પહેલાં તેમણે કર્ણાટકના ડિરેક્ટર જનરલ ઓફ પોલીસ(DGP) તરીકે સેવા આપી હતી.

આ પણ વાંચો: તમિલનાડુમાં વિજય સરકારને સપોર્ટ કરવો ભારે પડ્યો, પાર્ટીએ 29 બળવાખોર નેતાઓના પદ પર કાતર ફેરવી

સૂદનો જન્મ 1964માં હિમાચલ પ્રદેશના કાંગડા જિલ્લામાં થયો હતો. તેઓ 22 વર્ષની ઉંમરે ભારતીય પોલીસ સેવામાં જોડાયા હતા. તેમણે દિલ્હીની ઇન્ડિયન ઇન્સ્ટિટ્યૂટ ઑફ ટેક્નોલોજી (IIT)માંથી સિવિલ એન્જિનિયરિંગનો અભ્યાસ પૂર્ણ કર્યો હતો. તેમણે ઇન્ડિયન ઇન્સ્ટિટ્યૂટ ઑફ મેનેજમેન્ટ(IIM), બેંગલુરુ અને ન્યૂ યોર્ક સ્થિત મેક્સવેલ સ્કૂલ ઑફ ગવર્નન્સમાંથી સિરાક્યુઝ યુનિવર્સિટીમાંથી અનુસ્નાતક ડિગ્રી મેળવી હતી.