અમેરિકા બાદ કેનેડાથી પણ ભારતીયોને ડિપોર્ટ કરાયા, PM માર્ક કાર્નીએ કર્યો મોટો ખુલાસો

Canada India Deport Data : છેલ્લા કેટલાક વર્ષોમાં કેનેડામાંથી ભારતીય નાગરિકોને બળજબરીથી બહાર કાઢવાના કેસોમાં જબરદસ્ત વધારો થયો છે. કેનેડિયન બોર્ડર સર્વિસીસ એજન્સી (CBSA)ના ડેટા મુજબ, આ વર્ષે આ આંકડો રેકોર્ડ સ્તરે પહોંચી ગયો છે. 28 જુલાઈ-2025 સુધીમાં કેનેડામાંથી 1891 ભારતીય નાગરિકોને ડિપોર્ટ કરાયા છે, જ્યારે 2019માં આ સંખ્યા માત્ર 625 હતી. આ સાથે જ કેનેડામાંથી ડિપોર્ટ કરાયેલા લોકોની યાદીમાં ભારત મેક્સિકો પછી બીજા સ્થાને છે.

ડિપોર્ટની યાદીમાં ભારત બીજા ક્રમાંકે

કેનેડામાંથી જુલાઈ-2025માં સૌથી વધુ મેક્સિકોના 2678 લોકોને ડિપોર્ટ કરાયા છે, ત્યારબાજ બીજા ક્રમાંકે ભારત છે, જેમાં 1891 ભારતીયોનો દેશનિકાલ કરવામાં આવ્યો છે. આ પહેલા વર્ષ 2024માં કેનેડા તંત્રએ ભારતના 1997, મેક્સિકોના 3683 અને કોલંબિયાના 981 લોકોનો દેશનિકાલ કર્યો હતો.

આ પણ વાંચો : ટ્રમ્પના વિરોધમાં કેમ રસ્તા પર ઉતર્યા લાખો લોકો? નેશનલ ગાર્ડ્સને સ્ટેન્ડ બાય રહેવા આદેશ

ભારતીયોને કેમ ડિપોર્ટ કરાઈ રહ્યા છે?

કેનેડાના વડાપ્રધાન માર્ક કાર્નીએ તાજેતરમાં જ કહ્યું છે કે, તેમની સરકાર વિદેશી ગુનેગારોને તેમના દેશમાં પાછા મોકલવા પર ધ્યાન કેન્દ્રિત કરશે. આ પ્રક્રિયાને ઝડપી બનાવવા માટે ટ્રેકિંગમાં સુધારા કરવા અને વધુ સારા સંસાધનો ફાળવવાની યોજના છે. આ પહેલ કેનેડાની ઈમિગ્રેશન સિસ્ટમમાં થઈ રહેલા સુધારાઓનો એક ભાગ છે.

તાજેતરમાં જ આઠ ભારતીયોની ધરપકડ કરાઈ

તાજેતરમાં 450 પાર્સલોની કથિત ચોરીના આરોપમાં આઠ ભારતીય નાગરિકોની ધરપકડ કરવામાં આવી હતી. ધરપકડ કરાયેલા લોકોમાં સુમનપ્રીત સિંહ, ગુરદીપ ચઠ્ઠા, જશ્નદીપ જટ્ટાણા, હરમાન સિંહ, જસનપ્રીત સિંહ, મનરૂપ સિંહ, રાજબીર સિંહ અને ઉપિંદરજીત સિંહનો સમાવેશ થાય છે. પીલ રિજનલ પોલીસે 10 ઓક્ટોબરે એક પ્રેસ રિલીઝમાં જણાવ્યું હતું કે, તેઓ કેનેડા બોર્ડર સર્વિસ એજન્સી સાથે મળીને સક્રિય રીતે કામગીરી કરી રહ્યા છે. અમેરિકાની વાત કરીએ તો, યુએસ ઈમિગ્રેશન અને કસ્ટમ્સ એન્ફોર્સમેન્ટ (ICE)ના 2024ના ડેટા મુજબ 2024માં 1529 ભારતીયોને ડિપોર્ટ કરાયા હતા.

આ પણ વાંચો : ઝેલેન્સ્કીએ વધાર્યું પુતિનનું ટેન્શન, યુક્રેનના ડ્રોન હુમલોમાં ગેસ પ્લાન્ટ ખાક, આગના ગોટેગોટા ઉડ્યા