સ્વામી રામભદ્રાચાર્ય વિરૂદ્ધ ચાલતા આપત્તિજનક વીડિયો હટાવે ગૂગલ, મેટા અને યૂટ્યુબ..., HCએ આપ્યો 48 કલાકનો સમય

Allahabad High Court: અલ્હાબાદ હાઈકોર્ટની લખનઉ બેન્ચે ચિત્રકૂટ સ્થિત જગતગુરુ સ્વામી રામ ભદ્રાચાર્ય દિવ્યાંગ યુનિવર્સિટીના કુલપતિ સ્વામી રામ ભદ્રાચાર્ય સામે યુટ્યુબ ચેનલ અને અન્ય ઈન્ટરનેટ મીડિયા પ્લેટફોર્મ્સ પર ચાલી રહેલા કથિત વાંધાજનક વીડિયોને તાત્કાલિક દૂર કરવાનો આદેશ આપ્યો છે. કોર્ટે આ વીડિયો 48 કલાકની અંદર હટાવવાનો નિર્દેશ આપ્યો છે. ન્યાયાધીશ શેખર બી. સરાફ અને પ્રશાંત કુમારની ડિવિઝન બેન્ચે શરદ ચંદ્ર શ્રીવાસ્તવ અને અન્ય લોકો દ્વારા દાખલ કરવામાં આવેલી અરજી પર આ આદેશ આપ્યો હતો.

કોર્ટે Google અને Metaને આપ્યો નિર્દેશ

કોર્ટે મેટા પ્લેટફોર્મ્સ (Meta) અને ગૂગલ એલએલસી (Google) ને અરજદારો પાસેથી URL લિંક્સ મેળવવા અને સ્વામી રામ ભદ્રાચાર્ય સામેની કથિત વાંધાજનક સામગ્રીને 48 કલાકની અંદર દૂર કરવાનો આદેશ આપ્યો હતો. અરજીમાં દાવો કરવામાં આવ્યો હતો કે ગોરખપુર સ્થિત યુટ્યુબ એડિટર શશાંક શેખર ફેસબુક અને ઇન્સ્ટાગ્રામ પર પણ ચેનલો ચલાવે છે, અને 29મી ઓગસ્ટથી તે સ્વામી રામ ભદ્રાચાર્ય સામે અપમાનજનક વીડિયો ચલાવી રહ્યો છે. વારંવાર વિનંતી કરવા છતાં વીડિયો દૂર કરવામાં આવ્યા ન હતા.

આ પણ વાંચો: 'અમેરિકા માટે ભારત સાથે સંબંધ ખુબ મહત્ત્વના', વડાપ્રધાન મોદી સાથે મુલાકાત બાદ બોલ્યા રાજદૂત સર્જિયો ગોર

વીડિયોમાં દિવ્યાંગતા પર અપમાનજનક સામગ્રી

અરજીમાં જણાવાયું હતું કે આ વાંધાજનક વીડિયો "રામ ભદ્રાચાર્ય પર ખુલાસો - 16 વર્ષ પહેલા શું થયું" શીર્ષક હેઠળ પ્રસારિત થઈ રહ્યો છે. કોર્ટનું ધ્યાન દોરવામાં આવ્યું હતું કે સ્વામીજી બાળપણથી જ દૃષ્ટિહીન (દિવ્યાંગ) છે, છતાં તેમની અપંગતા અંગે અપમાનજનક સામગ્રી ધરાવતો વીડિયો પ્રસારિત થઈ રહ્યો છે. કોર્ટે જણાવ્યું કે પ્રથમ દ્રષ્ટિએ આ સામગ્રી રાજ્યના વિકલાંગ વ્યક્તિઓના કમિશનર દ્વારા કાર્યવાહીની જરૂરિયાત ઊભી કરે છે.

કોર્ટે હવે આગામી સુનાવણી 11મી નવેમ્બરના રોજ નક્કી કરી છે. આ સાથે અરજીમાં કેન્દ્ર અને રાજ્ય સરકારોને વિવિધ ઈન્ટરનેટ મીડિયા પ્લેટફોર્મને નિયંત્રિત કરવા અને તેના કડક અમલ માટે નિયમો બનાવવા વિનંતી કરવામાં આવી છે.