જંતર-મંતર પર આંદોલન વચ્ચે 3 મહિલા પત્રકારોની જાતીય સતામણીનો આરોપ! ક્રાઈમ બ્રાન્ચ કરશે તપાસ
Summarized by AI; it may make mistakes. Check important info
Summarized by AI; it may make mistakes. Check important info
Delhi police Assault Allegation: દિલ્હીના જંતર-મંતર પર 3 ઓક્ટોબરે મુખ્ય ચૂંટણી કમિશનર જ્ઞાનેશ કુમાર વિરુદ્ધ યોજાયેલા વિરોધ પ્રદર્શન દરમિયાન ત્રણ મહિલા પત્રકારોએ પોલીસકર્મીઓ પર જાતીય સતામણીના ગંભીર આરોપ લગાવ્યા છે. આ ગંભીર ફરિયાદો મળ્યા બાદ દિલ્હી પોલીસે મામલાની નિષ્પક્ષ અને સચોટ તપાસ માટે આ કેસ ક્રાઈમ બ્રાન્ચને સોંપી દીધો છે. રવિવારે એક પોલીસ અધિકારીએ આ અંગેની માહિતી આપી હતી.
શનિવારે એક મહિલા પત્રકારે મીડિયા સાથેની વાતચીતમાં આરોપ લગાવ્યો હતો કે દિલ્હી પોલીસના એક આસિસ્ટન્ટ કમિશનર ઓફ પોલીસ (ACP) દ્વારા તેની જાતીય સતામણી કરવામાં આવી છે. પોલીસ અધિકારીના જણાવ્યા અનુસાર, પ્રદર્શન દરમિયાન કાયદો અને વ્યવસ્થા જાળવવા માટે પોલીસકર્મીઓની તૈનાતી કરવામાં આવી હતી, આ દરમિયાન બનેલી કથિત ઘટનાઓને લઈને નવી દિલ્હી જિલ્લા પોલીસને ફરિયાદો મળી છે. ન્યાયિક અને નિષ્પક્ષ તપાસ સુનિશ્ચિત કરવા માટે જિલ્લા પોલીસે આ મામલો ક્રાઈમ બ્રાન્ચને ટ્રાન્સફર કર્યો છે, જ્યાં હવે ફરિયાદકર્તા મહિલા પત્રકારો અને અન્ય સંબંધિત લોકોના નિવેદનો નોંધવામાં આવશે.
મહિલા પત્રકારની આપવીતી
ઘટના અંગે વાત કરતા એક મહિલા પત્રકારે જણાવ્યું કે, 'હું જંતર-મંતર પર ચાલી રહેલા પ્રદર્શનને કવર કરી રહી હતી. તે સમયે એક એસીપી દ્વારા કથિત રીતે મારી જાતીય સતામણી કરવામાં આવી. જ્યારે પોલીસકર્મીઓ પ્રદર્શનકારીઓને કસ્ટડીમાં લઈ રહ્યા હતા ત્યારે સ્થળ પર કોઈ મહિલા પોલીસકર્મી હાજર ન હતી. જ્યારે મેં દિલ્હી પોલીસના એસીપી વિવેક ભગતને પૂછ્યું કે મહિલા પોલીસકર્મીઓ કેમ હાજર નથી, ત્યારે તેમણે યૌન ઉત્પીડન કરીને મને પાછળ ધકેલી દીધી હતી. આ ઘટના બાદ હું અન્ય લોકો સાથે FIR નોંધાવવા પોલીસ સ્ટેશન ગઈ હતી, પરંતુ અત્યાર સુધી આ મામલે કોઈ કાર્યવાહી કરવામાં આવી નથી.'
પ્રેસ કાઉન્સિલ ઓફ ઈન્ડિયા અને પ્રેસ ક્લબ દ્વારા નારાજગી વ્યક્ત કરવામાં આવી
આ ઘટનાને લઈને પ્રેસ કાઉન્સિલ ઓફ ઈન્ડિયા (PCI)એ પ્રદર્શન કવર કરી રહેલી મહિલા પત્રકારો સાથેના પોલીસના કથિત વર્તન સામે નારાજગી વ્યક્ત કરી છે. પીસીઆઈ (PCI)એ દિલ્હી પોલીસ પાસે મહિલા પત્રકારની ફરિયાદ પર ત્વરિત કાર્યવાહી કરવાની માંગ કરી છે. કાઉન્સિલે જણાવ્યું કે લોકશાહીમાં આ પ્રકારનું વર્તન સ્વીકારી શકાતું નથી અને પત્રકારોને કોઈપણ ડર વગર સ્વતંત્ર રીતે કામ કરવાની તેમજ ઘટનાઓ નોંધવાની આઝાદી મળવી જોઈએ. જો દેશની રાજધાનીના કેન્દ્રમાં પણ મીડિયાકર્મીઓ સુરક્ષિત ન હોય, તો તે દેશમાં મીડિયાની સ્વતંત્રતા માટે સારો સંકેત નથી.
આ ઉપરાંત, 'પ્રેસ ક્લબ ઓફ ઈન્ડિયા'એ પણ સખત નિવેદન જાહેર કરીને શુક્રવાર અને શનિવારના પ્રદર્શન દરમિયાન પત્રકારો સાથે થયેલા કથિત દુર્વ્યવહાર સામે નારાજગી દર્શાવી છે. પ્રેસ ક્લબે જંતર-મંતર અને તેની આસપાસના વિસ્તારમાં ઇન્ટરનેટ સેવાઓ બંધ કરવાના પગલા પર પણ ગંભીર સવાલો ઉઠાવ્યા છે અને દિલ્હી પોલીસને તાત્કાલિક કડક પગલાં લેવા અપીલ કરી છે.
