ગુજરાતમાં હજુ સુધી મોસમનો 34.53% વરસાદ

અમદાવાદ,ગુરુવાર

ગુજરાતમાં ૧૧.૨૯ ઈંચ સાથે મોસમનો સરેરાશ ૩૪.૫૩% વરસાદ નોંધાઇ ચૂક્યો છે. હવામાન વિભાગે આગામી બે દિવસ દરમિયાન દક્ષિણ ગુજરાત-સૌરાષ્ટ્રના અનેક જિલ્લાઓમાં ભારેથી અતિભારે વરસાદની આગાહી કરેલી છે.

હવામાન વિભાગે જણાવ્યું છે કે, 'શુક્રવારે દક્ષિણ ગુજરાતના વલસાડ- દમણ- ડાંગ- સુરત- નવસારી, સૌરાષ્ટ્રના ગીર સોમનાથ-દીવમાં અતિભારે, નર્મદા-તાપી-પોરબંદર-જામનગર-દ્વારકા-કચ્છમાં ભારે જ્યારે શનિવારે અમરેલી-ગીર સોમનાથમાં અતિ ભારે, નવસારી-વલસાડ-દમણ-દાદરા નગર હવેલી-જુનાગઢ-ભાવનગર-દીવમાં ભારે વરસાદ પડી શકે છે. ' અમદાવાદમાં આજે દિવસનું તાપમાન ૩૫.૮ ડિગ્રી જ્યારે ભેજનું પ્રમાણ સવારે ૮ઃ૩૦ના ૯૪%-સાંજે ૫ઃ૩૦ના ૬૬% નોંધાયું હતું. અમદાવાદમાં આગામી બે દિવસ ગાજવીજ સાથે વરસાદ પડે તેની પૂરી સંભાવના છે.

અમદાવાદમાં આજે દિવસ દરમિયાન ઉકળાટ-બફારાથી લોકો ત્રસ્ત રહ્યા હતા. ઉલ્લેખનીય છે કે,રાજ્યમાં સામાન્ય રીતે સૌરાષ્ટ્ર કરતાં દક્ષિણ ગુજરાતમાં વરસાદનું વધારે પ્રમાણ હોય છે. પરંતુ આ વખતે અત્યારસુધી વિરોધાભાસભરી સ્થિતિ છે.  હાલમાં રાજ્યમાંથી સૌરાષ્ટ્રમાં ે૧૭ ઈંચ જ્યારે દક્ષિણ ગુજરાતમાં ૧૧.૨૯ ઈંચ વરસાદ નોંધાયો છે.