સાડીમાં વણી લેવાઈ આખી રામાયણ, સુરતના કલાકારની 45 દિવસની મહેનત
Summarized by AI; it may make mistakes. Check important info
Summarized by AI; it may make mistakes. Check important info
Ramayana Saree In Surat: ટેક્સટાઈલ સિટી સુરત હંમેશા તેના અવનવા કલેક્શન અને નવીનતા માટે જાણીતું છે. હાલમાં જ સુરતના સરસાણા કન્વેન્શન સેન્ટર ખાતેના ગ્લોબલ ફેબ્રિક્સ એક્સપોમાં એક અદભુત કલાત્મકતા જોવા મળી છે. આ એક્સપોમાં રામાયણ થીમ પર તૈયાર કરાયેલી એક ખાસ સાડી અત્યારે ભારે આકર્ષણનું કેન્દ્ર બની છે. આ અનોખી કળાને જોવા માટે એક્સપોના પ્રથમ 2 દિવસમાં જ 20,000 થી વધુ મુલાકાતીઓ ઉમટી પડ્યા હતા.
કેવી રીતે તૈયાર થઈ આ ખાસ 'રામાયણ સાડી'?
આ અદભુત સાડીના સર્જક અને સુરતના વીવર પ્રિતેશ સાસપરાએ જણાવ્યું કે, તેઓ ટેક્સટાઈલ માર્કેટમાં કંઈક સાવ અલગ અને અનોખું રજૂ કરવા માંગતા હતા. આ આખી સાડીને પૂર્ણ વિગતો સાથે તૈયાર કરવામાં કુલ 45 દિવસનો સમય લાગ્યો હતો. સાડી પર રામાયણના પ્રસંગો આબેહૂબ દેખાય તે માટે માત્ર તેની ડિઝાઈનના સ્કેચ તૈયાર કરવામાં જ 25 દિવસનો સમય વીત્યો હતો.
3,000 જેટલા અલગ-અલગ કલર શેડ્સનો ઉપયોગ
સ્કેચ તૈયાર થયા બાદ આ સાડીને રેપિયર જેકાર્ડ મશીન પર વણાટ કરવામાં આવી હતી અને ત્યારબાદ પોઝિશન પ્રિન્ટ મશીનની મદદથી તેના પર આકર્ષક રંગો પૂરવામાં આવ્યા હતા. રામાયણના પાત્રો અને સમગ્ર ડિઝાઈનને એકદમ જીવંત અને વાસ્તવિક લુક આપવા માટે આ સાડીમાં નાની-નાની વિગતો સાથે 3,000 જેટલા અલગ-અલગ કલર શેડ્સનો ઉપયોગ કરવામાં આવ્યો છે.
સાડીમાં કયા કયા પ્રસંગો વણી લેવાયા છે?
6 મીટર લાંબી આ સાડીમાં પ્રભુ શ્રીરામના જીવનના મહત્વના અને હૃદયસ્પર્શી પ્રસંગોને કંડારવામાં આવ્યા છે, જેમાં મુખ્યત્વે ભગવાન શ્રીરામ અને માતા સીતાજીનો સ્વયંવર, લક્ષ્મણ રેખા અને સીતા હરણ, ભક્તિભાવથી સભર કેવટ મિલાપ, અને ભાવુક કરનારો રામ-હનુમાન મિલાપ પ્રસંગને આવરી લેવાયા છે.
હાલમાં આ સાડી માત્ર એક સેમ્પલ તરીકે જ તૈયાર કરવામાં આવી છે, પરંતુ તેની અદભુત સુંદરતા જોઈને એક્સપોમાં આવેલા દેશ-વિદેશના ઘણા મોટા વેપારીઓએ અત્યારથી જ આ સાડી માટે ઓર્ડર આપવાની તૈયારી બતાવી દીધી છે.
