જામનગરમાં પરમિશન ન મળતાં ગીતા મંદિર સામેના ઝેન-જી ગરબા મુલતવી રાખ્યા

Jamnagar: જામનગરના ગીતા મંદિર સામેના વિસ્તારમાં યોજાનારા વિવાદાસ્પદ ઝેન-જી ગરબાના આયોજન પર મંજૂરી ન મળતાં ગઈકાલે પૂર્ણવિરામ મુકાયું હતું. અગાઉ આયોજક દ્વારા ગરબા યોજવા માટે અરજી કરવામાં આવી હતી, પરંતુ અરજી દફતરે થતાં આયોજન માટે જરૂરી પરવાનગી મળી શકી ન હતી.

આયોજનને લઈને આસપાસની સોસાયટીઓના રહીશો દ્વારા વિરોધ વ્યક્ત કરવામાં આવ્યો હતો. વિસ્તારની શાંતિ, વાહનોના પાર્કિંગ અને ટ્રાફિકની સમસ્યાને લઈને રજૂઆતો થતાં આ ગરબાનું આયોજન વિવાદમાં આવ્યું હતું. આ સંજોગોમાં પોલીસ તંત્ર દ્વારા મંજૂરી વિના ગરબા યોજાય નહીં તે માટે કાર્યવાહી કરવામાં આવી હતી.

પરવાનગી ન મળવાના કારણે ગઈકાલે ગરબા મુલતવી રાખવાની જાહેરાત આયોજક દ્વારા કરવામાં આવી હતી. જોકે, આગામી દિવસોમાં જરૂરી મંજૂરી મેળવવા માટે ફરીથી અરજી કરવામાં આવે તેવી શક્યતા છે. આથી ઝેન-જી ગરબાના આયોજન અંગે હવે તંત્ર દ્વારા શું નિર્ણય લેવામાં આવે છે તેના પર સૌની નજર રહેશે.