જામનગરની વંડાફળીની 64 જોગણી ગરબીમાં નાની બાળાઓની અનોખી આરાધના

Jamnagar: જામનગર શહેરના વંડાફળી વિસ્તારમાં વર્ષોથી યોજાતી 64 જોગણી ગરબી નવરાત્રિનું એક આગવું આકર્ષણ બની રહી છે. આ ગરબીની વિશેષતા એ છે કે તેમાં પાંચ વર્ષથી નાની 64 બાળાઓ માતાજીનાં ગુણગાન ગાઈને ગરબે ઘૂમે છે અને ભક્તિભાવપૂર્વક આરાધના કરે છે. નાની-નાની બાળાઓના મનમોહક રાસ અને ભક્તિમય માહોલને નિહાળવો એ શ્રદ્ધાળુઓ માટે એક અનોખો લહાવો બની રહે છે.

વંડાફળીની આ વિશિષ્ટ ગરબી નિહાળવા બાળાઓનાં વાલીઓ, પરિવારજનો ઉપરાંત જામનગરના અન્ય નગરજનો પણ મોટી સંખ્યામાં ઉમટી પડે છે. નાની બાળાઓના તાલબદ્ધ રાસ અને માતાજીની આરાધનાથી સમગ્ર વાતાવરણ ભક્તિમય બની જાય છે. પરંપરા, સંસ્કાર અને શ્રદ્ધાનો સુંદર સમન્વય રજૂ કરતી વંડાફળીની ૬૪ જોગણી ગરબી જામનગર શહેર માટે આકર્ષણનું કેન્દ્ર બની રહી છે.