જામનગરમાં તંત્રની પહેલથી વેપારીઓ અને લોકોની હાલાકી ઘટી

Jamnagar: જામનગરના શરૂ સેક્શન રોડ પર ફૂટપાથ પર ધંધો કરતા રાજસ્થાની વેપારીઓને મહાનગરપાલિકા દ્વારા સરલાબેન આવાસ રોડના મેદાનમાં વૈકલ્પિક જગ્યા ફાળવવામાં આવતાં વેપારીઓ અને શહેરીજનો બંનેને રાહત મળી છે. નવી જગ્યાએ શરૂઆતમાં ગ્રાહકો મળશે કે કેમ તે અંગે વેપારીઓમાં આશંકા હતી, પરંતુ પ્રથમ દિવસથી જ મોટી સંખ્યામાં લોકો ખરીદી માટે પહોંચતાં મોડી રાત સુધી બજાર જામ્યું હતું.

તહેવારોના દિવસોમાં શરૂ સેક્શન રોડ પર કપડાં, બેડશીટ, પડદા સહિતની ઘરવપરાશની ચીજવસ્તુઓનું વેચાણ કરતા વેપારીઓના કારણે ટ્રાફિકની સમસ્યા સર્જાતી હતી. આ અંગે મહાનગરપાલિકાની એસ્ટેટ શાખા દ્વારા દબાણ હટાવવાની કાર્યવાહી પણ કરવામાં આવી હતી. અગાઉ વેપારીઓ અને તંત્ર વચ્ચે ઘર્ષણ થતાં આ મુદ્દો વિવાદમાં આવ્યો હતો.

વેપારીઓના રોજગારને અસર ન થાય અને રસ્તા પરની ટ્રાફિક સમસ્યાનો ઉકેલ આવે તે હેતુથી મેયર મોનિકાબેન વ્યાસ તથા મ્યુનિસિપલ કમિશનર દીપેશ કેડિયાની સૂચનાથી વૈકલ્પિક વ્યવસ્થા કરવામાં આવી હતી. મેદાનમાં રોશની સહિતની સુવિધા ઊભી થતાં વેપારીઓએ નવા સ્થળે ધંધો શરૂ કર્યો છે. પ્રથમ દિવસથી જ ગ્રાહકોનો પ્રતિસાદ મળતાં વેપારીઓએ પણ રાહત અનુભવી છે. આમ, તંત્રની પહેલથી એક તરફ ફૂટપાથ પરનાં દબાણો દૂર થતાં ટ્રાફિક વ્યવસ્થામાં સુધારો થયો છે, તો બીજી તરફ વેપારીઓને રોજગાર માટે યોગ્ય જગ્યા મળી છે.