શેઠવડાળાના ગાંગણપાટ ડેમમાં ગેરકાયદે ખનન ઝડપાયું: બે જેસીબી અને પાંચ ટ્રેક્ટર સહિત રૂ. 95 લાખનો મુદ્દામાલ કબજે
Summarized by AI; it may make mistakes. Check important info
Summarized by AI; it may make mistakes. Check important info

Jamnagar: જામનગર જિલ્લામાં ગેરકાયદેસર ખનીજ ખનન અને વહન સામે પોલીસ દ્વારા કાર્યવાહી હાથ ધરવામાં આવી રહી છે, ત્યારે જામજોધપુર તાલુકાના શેઠવડાળા ગામે આવેલા ગાંગણપાટ ડેમમાં ગેરકાયદેસર રીતે માટીનું ખોદકામ થતું હોવાનું સામે આવ્યું છે. શેઠવડાળા પોલીસે સ્થળ પર દરોડો પાડીને બે જેસીબી મશીન અને પાંચ ટ્રેક્ટર મળી કુલ રૂ. 95 લાખનો મુદ્દામાલ ઝડપી પાડ્યો છે.
રાજકોટ વિભાગના નાયબ પોલીસ મહાનિરીક્ષક નિર્લિપ્ત રાય તથા જામનગર જિલ્લા પોલીસ અધિક્ષક ડો. રવિ મોહન સૈનીની સૂચના અને લાલપુર વિભાગના મદદનીશ પોલીસ અધિક્ષક પ્રતિભાના માર્ગદર્શન હેઠળ શેઠવડાળા પોલીસ મથકના પોલીસ ઇન્સ્પેક્ટર આર.બી. સોલંકી તથા તેમની ટીમ પેટ્રોલિંગમાં હતી.
તે દરમિયાન પોલીસ હેડ કોન્સ્ટેબલ ગૌતમભાઈ પ્રેમજીભાઈ મકવાણા અને કોન્સ્ટેબલ વરજાંગભાઈ કાનાભાઈ કટારાને બાતમી મળી હતી કે શેઠવડાળા ગામના ગાંગણપાટ ડેમમાં કેટલાક શખસો દ્વારા ગેરકાયદેસર રીતે માટીનું ખોદકામ કરવામાં આવી રહ્યું છે. આ બાતમીના આધારે પોલીસ ટીમે સ્થળ પર તપાસ કરતાં ડેમમાંથી બે જેસીબી મશીન અને પાંચ ટ્રેક્ટર દ્વારા માટીનું ખોદકામ થતું હોવાનું મળી આવ્યું હતું.
પોલીસે કુલ રૂ. 95 લાખનો મુદ્દામાલ કબજે કરી સમગ્ર મામલે ખાણ-ખનીજ વિભાગ મારફતે કાયદેસરની કાર્યવાહી હાથ ધરી છે. આ અંગે જામનગર ખાણ-ખનીજ વિભાગને રિપોર્ટ પણ સુપરત કરવામાં આવ્યો છે.




