જામનગરમાં કચરાના ટ્રકની ટક્કરથી એસ.ટી. બસનો આગળનો કાચ તૂટ્યો

Jamnagar: જામનગરના સાત રસ્તા નજીક પુલ નીચે મહાનગરપાલિકાના કચરાના ટ્રકના ચાલકે ટ્રક રિવર્સમાં બેદરકારીપૂર્વક ચલાવી એસ.ટી. બસને ટક્કર મારતાં બસના આગળના કાચને નુકસાન થયું હતું. આ બનાવ અંગે સીટી ‘બી’ ડિવિઝન પોલીસ સ્ટેશનમાં ફરિયાદ નોંધાઈ છે.

પોલીસમાં નોંધાયેલી વિગતો મુજબ, ધ્રોલના ગાયત્રીનગરમાં રહેતા અને એસ.ટી. બસના ચાલક તરીકે ફરજ બજાવતા બાબુભાઈ હુરાભાઈ ભરવાડ (ઉંમર 46) તા. 20 ઓક્ટોબરના રોજ સાંજે આશરે 7:30 વાગ્યે જામનગરના સાત રસ્તા નજીક પુલ નીચે પોતાની સરકારી બસ લઈને હતા. આ દરમિયાન જામનગર મહાનગરપાલિકાના કચરાના ટ્રક નંબર જીજે-10-ટીવાય-6181ના ચાલકે ટ્રક પૂરઝડપે અને બેદરકારીપૂર્વક રિવર્સમાં ચલાવી બસના આગળના ભાગે ટક્કર મારી હતી. આ અકસ્માતમાં બસનો આગળનો સંપૂર્ણ કાચ તૂટી ગયો હતો, જેની કિંમત આશરે રૂ. 40,000હોવાનું ફરિયાદમાં જણાવાયું છે.

આ અંગે તા. 21 ઓક્ટોબરના રોજ ભારતીય ન્યાય સંહિતાની કલમ 281 અને 324(4) તથા મોટર વાહન અધિનિયમની કલમ 177 અને 184 મુજબ ગુનો નોંધવામાં આવ્યો છે.