'હું રાષ્ટ્રપ્રમુખ પદ છોડવા માટે તૈયાર', રશિયા-યુક્રેન યુદ્ધ વચ્ચે ઝેલેન્સ્કીનું ચોંકાવનારું નિવેદન

Zelensky Ready to Resign: રશિયા સાથે ચાલી રહેલા યુદ્ધ વચ્ચે યુક્રેનના રાષ્ટ્રપ્રમુખ ઝેલેન્સ્કીએ એક ઐતિહાસિક નિવેદન આપ્યું છે. તેમણે કહ્યું છે કે રશિયા સાથેનું યુદ્ધ સમાપ્ત થયા પછી તેઓ રાષ્ટ્રપ્રમુખ પદ છોડવા તૈયાર છે. મીડિયા સાથેની વાતચીતમાં ઝેલેન્સ્કીએ સ્પષ્ટ કર્યું કે તેમનો મુખ્ય ઉદ્દેશ્ય રાષ્ટ્રપ્રમુખ પદ પર રહેવાનો નથી, પરંતુ યુદ્ધને સમાપ્ત કરવાનો છે.

'હું રાષ્ટ્રપ્રમુખ પદ છોડવા માટે તૈયાર છું': ઝેલેન્સ્કી

મીડિયા સાથેની વાતચીતમાં ઝેલેન્સ્કીએ નિવેદન આપ્યું છે કે, 'મારું ધ્યાન યુદ્ધને સમાપ્ત કરવા પર છે, પદ પર રહેવા પર નહીં. યુદ્ધ સમાપ્ત થયા પછી, હું પદ છોડવા માટે તૈયાર છું.' આ નિવેદન ત્રણ વર્ષથી વધુ સમયથી ચાલી રહેલા રશિયા-યુક્રેન યુદ્ધ વચ્ચે આવ્યું છે, જે વિશ્વભરમાં સુરક્ષા અને રાજકીય દૃષ્ટિકોણથી ચર્ચાનો વિષય બન્યું છે.

ઝેલેન્સ્કીએ શું કહ્યું?

રશિયા અને યુક્રેન વચ્ચેના સંઘર્ષે બંને દેશોની રાજનીતિને તો અસર કરી જ છે, પરંતુ તેની ગંભીર અસરો વૈશ્વિક સ્તરે પણ જોવા મળી છે. આ મુશ્કેલ સમયમાં ઝેલેન્સ્કીએ ભારપૂર્વક જણાવ્યું કે તેમનો મુખ્ય ઉદ્દેશ્ય દેશને સ્થિર અને સુરક્ષિત બનાવવાનો છે. તેમણે સ્પષ્ટ કર્યું કે તેઓ કોઈ વ્યક્તિગત સત્તા કે પદની લાલસાથી લડી રહ્યા નથી, પરંતુ દેશ અને તેના લોકોની ભલાઈ માટે કામ કરી રહ્યા છે.

યુદ્ધ સમાપ્ત થતાં સત્તા કોને મળશે?

વાતચીત દરમિયાન યુક્રેનના રાષ્ટ્રપ્રમુખએ એમ પણ કહ્યું કે, 'યુદ્ધ સમાપ્ત થયા પછી સત્તાનું હસ્તાંતરણ કરવાનો નિર્ણય સંપૂર્ણપણે પરિસ્થિતિ પર આધાર રાખશે. તેમણે સંકેત આપ્યો કે તેમની પ્રાથમિકતા દેશની સુરક્ષા, નાગરિકોનું રક્ષણ અને આંતરરાષ્ટ્રીય સહયોગ સુનિશ્ચિત કરવાની છે.

રાજકીય દૃષ્ટિકોણથી અત્યંત મહત્ત્વપૂર્ણ નિવેદન

નિષ્ણાતોના મતે, ઝેલેન્સ્કીનું આ નિવેદન રાજકીય દૃષ્ટિકોણથી અત્યંત મહત્ત્વપૂર્ણ છે. આ નિવેદન માત્ર તેમના નેતૃત્વની પ્રતિબદ્ધતાને જ નહીં, પરંતુ વૈશ્વિક સમુદાય સમક્ષ પણ સ્પષ્ટ કરે છે કે તેમનું ધ્યાન વ્યક્તિગત સત્તા પર નહીં, પરંતુ યુદ્ધ અને સંકટનો ઉકેલ લાવવા પર છે.

યુદ્ધના કારણે લોકોમાં અનિશ્ચિતતા વધી

યુક્રેનમાં આ ઘોષણા એટલા માટે પણ મહત્ત્વપૂર્ણ છે કારણ કે દેશમાં યુદ્ધ અને રાજકીય અસ્થિરતાને કારણે લોકોમાં અનિશ્ચિતતા વધી છે. ઝેલેન્સ્કીના આ નિવેદનથી એ સંદેશ જાય છે કે યુદ્ધ સમાપ્ત થયા પછી સત્તાનું શાંતિપૂર્ણ રીતે હસ્તાંતરણ થઈ શકે છે. ઝેલેન્સ્કીએ એમ પણ ઉમેર્યું કે તેમનો નિર્ણય દેશની રણનીતિ, સુરક્ષા અને ભવિષ્યના હિતોને ધ્યાનમાં રાખીને લેવામાં આવશે.

આ પણ વાંચો: 'રશિયાની સેના માત્ર કાગળનો વાઘ', યુક્રેનની જમીનને લઈને ટ્રમ્પનું મોટું નિવેદન

તેમણે ખાતરી આપી કે તેમનું નેતૃત્વ યુદ્ધની સમાપ્તિ સુધી મજબૂતી અને સ્થિરતા જાળવી રાખવા માટે પ્રતિબદ્ધ રહેશે. રશિયા-યુક્રેન યુદ્ધ હવે ત્રણ વર્ષથી વધુ સમયથી ચાલી રહ્યું છે અને તેના કારણે હજારો લોકોએ જીવ ગુમાવ્યા છે, લાખો લોકો વિસ્થાપિત થયા છે અને આર્થિક તથા સામાજિક સંકટ સર્જાયું છે. આવા સમયે ઝેલેન્સ્કીનું આ નિવેદન દર્શાવે છે કે તેઓ દેશની સ્થિરતા અને શાંતિને સૌથી ઉપર રાખે છે.