કોરોનાને કારણે વિશ્વના ૧.૨૫ અબજ લોકોની નોકરી સામે ખતરો

(પીટીઆઇ) જીનિવા, તા. ૭

કોરોના મહામારીને કારણે વિશ્વના ૧.૨૫ અબજ લોકોની નોકરી સામે ખતરો ઉભો થયો છે તેમ યુનાઇટેડ નેશન્સે આજે જણાવ્યું હતું. યુએનના જણાવ્યા મુજબ બીજા વિશ્વ યુદ્ધ પછી આ સૌથી ખરાબ વૈશ્વિક કટોકટી છે. 

યુએનએ ઇન્ટરનેશનલ લેબર ઓર્ગેનાઇઝેશનના અહેવાલનો સંદર્ભ આપી જણાવ્યું છેે કે કોરોના મહામારીને કારણે માત્ર ૨૦૨૦ના બીજા કવાર્ટરમાં જ વિશ્વમાં કામકાજના કલાકોમાં ૬.૭ ટકાનો ઘટાડો થયો છે. જેના કારણે ૧૯.૫ કરોડ ફૂલ ટાઇમ કામદારોની નોકરી જશે. 

આ અહેવાલ મુજબ એશિયા પેસિફિક ક્ષેત્રમાં સૌૈથી વધુ લોકોની રોજગારી છીનવાશે. વિશ્વના દર પાંચ કામદારો પૈકી ચાર કામદારો એવા દેશના છે જ્યાં લોકડાઉન અમલમાં છે. 

આ અહેવાલ અનુસાર કોરોનાથી ૨૦૦૮ની નાણાકીય કટોકટીને કારણે જે નુકસાન થયું હતું તેના કરતા વધારે નુકસાન થશે. ઉલ્લેખનીય છે કે છેલ્લા બે સપ્તાહમાં કોરોનાના કેસોમાં મોટા પ્રમાણમાં વૃદ્ધિ જોવા મળી છે.