પરિસ્થિતિ કાબૂમાં નથી રહી : અમેરિકાના ઈરાન પર હુમલા બાદ UNને ચિંતા પેઠી, કરી અપીલ

US Attack On Iran: અમેરિકાએ પણ હવે ઈઝરાયલ અને ઈરાન વચ્ચેના યુદ્ધમાં ઝંપલાવ્યું છે. રવિવારે (22મી જૂન) સવારે ભારતીય સમય મુજબ અમેરિકાએ હવાઈ હુમલામાં ઈરાનના ત્રણ પરમાણુ ઠેકાણા ફોર્ડો, નતાન્ઝ અને ઇસ્ફહાનને નિશાન બનાવ્યા. ઈઝરાયલે આ હુમલાઓ બદલ અમેરિકાની પ્રશંસા કરી હતી. આ દરમિયાન સંયુક્ત રાષ્ટ્ર (UN)એ અમેરિકાની આ કાર્યવાહી પર ચિંતા વ્યક્ત કરી અને કહ્યું કે 'આ યુદ્ધ હવે બેકાબૂ થવાનો ભય ઊભો થયો છે, પરિસ્થિતિ હવે કાબૂમાં નથી રહી.'

'આંતરરાષ્ટ્રીય શાંતિ અને સુરક્ષા માટે સીધો ખતરો'

સંયુક્ત રાષ્ટ્રના મહાસચિવ એન્ટોનિયો ગ્યુટરેસે કહ્યું કે, 'અમેરિકા દ્વારા ઈરાન વિરુદ્ધ કરવામાં આવેલી સૈન્ય કાર્યવાહી વિશે સાંભળીને મને ખૂબ જ ચિંતા થઈ છે. આ એક ખતરનાક ઉશ્કેરણીજનક કાર્યવાહી છે જે પહેલાથી જ તણાવની આરે છે અને તે આંતરરાષ્ટ્રીય શાંતિ અને સુરક્ષા માટે સીધો ખતરો છે.'

આ પણ વાંચો: ઈઝરાયલ-ઈરાન યુદ્ધમાં અમેરિકાની એન્ટ્રી, 3 પરમાણુ ઠેકાણે હુમલા, દુનિયાભરમાં હડકંપ

અમેરિકાની કાર્યવાહી અંગે એન્ટોનિયો ગ્યુટરેસે કહ્યું કે, 'આ સંઘર્ષ નિયંત્રણ બહાર જવાનો ભય ઝડપથી વધી રહ્યો છે, જેની માત્ર નાગરિકો પર જ નહીં પરંતુ સમગ્ર ક્ષેત્ર અને સમગ્ર વિશ્વ પર વિનાશક અસર પડી શકે છે. હું બધા સભ્ય દેશોને તણાવ ઓછો કરવા અને સંયુક્ત રાષ્ટ્ર ચાર્ટર અને આંતરરાષ્ટ્રીય કાયદાના અન્ય નિયમો હેઠળ તેમની જવાબદારીઓ પૂર્ણ કરવા અપીલ કરું છું. આ ખૂબ જ સંવેદનશીલ સમય છે ત્યારે અરાજકતા ટાળવી ખૂબ જ જરૂરી બની ગઈ છે. આ સંકટનો કોઈ સૈન્ય ઉકેલ નથી. આગળ વધવાનો રસ્તો ફક્ત રાજદ્વારી છે અને શાંતિ જ એકમાત્ર આશા છે.'

હુમલા બાદ ટ્રમ્પે રાષ્ટ્રને સંબોધિત કર્યા

અમેરિકા પણ ઈરાન અને ઈઝરાયલ વચ્ચે ચાલી રહેલા યુદ્ધમાં ખુલ્લેઆમ જોડાઈ ગયું છે. અમેરિકાના પ્રમુખ ડોનાલ્ડ ટ્રમ્પે કહ્યું કે, 'અમેરિકાએ ઈરાનના ત્રણ મુખ્ય પરમાણુ સ્થળો - ફોર્ડો, નતાન્ઝ અને ઇસ્ફહાન પર સફળતાપૂર્વક હવાઈ હુમલા કર્યા છે અને હુમલો કર્યા બાદ તમામ વિમાનો સુરક્ષિત પાછા ફરી ગયા છે.' આ હુમલા બાદ ટ્રમ્પે રાષ્ટ્રને સંબોધિત કરતાં ઈરાનને ચેતવણી આપી હતી.