ઇઝરાયલ વિરુદ્ધ બે ઈસ્લામિક દેશ એકજૂટ, મતભેદો ભૂલી કતાર પહોંચ્યા યુએઈના પ્રમુખ નાહ્યાન

UAE President Nahyan met Qatar Sheikh Thani: ઇઝરાયલ દ્વારા કતાર પર કરાયેલા હવાઈ હુમલાના પગલે, યુનાઈટેડ આરબ એમિરેટ્સ (UAE) ના રાષ્ટ્રપતિ શેખ મુહમ્મદ બિન જાયદ અલ નાહ્યાન જૂના મતભેદોને બાજુ પર મૂકીને બુધવારે દોહા પહોંચ્યા, જ્યાં તેમણે કતારના શાસક શેખ તમીમ બિન હમદ અલ થાની સાથે મુલાકાત કરી.

કતારે હજુ સુધી ઇઝરાયલને માન્યતા આપી નથી

નાહ્યાન અગાઉ પણ ઇઝરાયલની પ્રવૃત્તિઓ અંગે અસહજતા વ્યક્ત કરી ચૂક્યા છે અને તેમણે વેસ્ટ બેન્કને વિભાજિત કરવાની ઇઝરાયલની યોજનાનો વિરોધ પણ કર્યો હતો. અહીં એ નોંધવું જરૂરી છે કે કતારે હજી સુધી ઇઝરાયલને માન્યતા આપી નથી, જેથી બંને દેશો વચ્ચે કોઈ સત્તાવાર સંબંધો અસ્તિત્વમાં નથી.

કતારના વડાપ્રધાને નેતન્યાહૂની નિંદા કરી

ઇઝરાયલના આ હુમલાને કારણે, કતાર હવે ઇઝરાયલને કેવી રીતે જવાબ આપવો તે અંગે વિચારણા કરી રહ્યું છે. ઇઝરાયલ અને હમાસ વચ્ચે યુદ્ધવિરામ માટે મધ્યસ્થીની ભૂમિકા ભજવી રહેલા કતાર પર થયેલા આ હુમલાથી દુનિયા આશ્ચર્યચકિત છે.

બુધવારે કતારના વડાપ્રધાન શેખ મોહમ્મદ બિન અબ્દુલરહમાન બિન જાસિમ અલ-થાનીએ ઇઝરાયલના વડાપ્રધાન બેન્જામિન નેતન્યાહૂની આકરી નિંદા કરી. તેમણે નેતન્યાહૂ પર પ્રાદેશિક સ્થિરતાને જોખમમાં મૂકવાનો અને યુદ્ધવિરામ કે ગાઝામાં બંધક બનાવાયેલા લોકોની મુક્તિની આશાઓને નષ્ટ કરવાનો આરોપ લગાવ્યો.

આ પણ વાંચો: મસ્કને જોરદાર ઝટકો, ઓરેકલના સ્થાપક વિશ્વના સૌથી ધનિક વ્યક્તિ બન્યાં, જાણો કેટલી સંપત્તિ?

એક ઈન્ટરવ્યૂમાં અલ-થાનીએ દોહા પર ઇઝરાયલના તાજેતરના હવાઈ હુમલાને 'રાજ્ય આતંક' ગણાવ્યો અને ચેતવણી આપી કે આ હુમલાથી કતાર દ્વારા ઇઝરાયલ અને હમાસ વચ્ચે ચાલી રહેલા નાજુક મધ્યસ્થી પ્રયાસો નષ્ટ થઈ ગયા છે.

ઇઝરાયલ પર પ્રતિબંધોની ચર્ચા થશે

ગાઝાના મુદ્દા પર, યુરોપિયન યુનિયન (EU)ના પ્રમુખ ઉર્સુલા વોન ડેર લેયેને ઇઝરાયલ પર પ્રતિબંધો લાદવાની અને આંશિક રીતે વેપાર રોકવાની ઇચ્છા વ્યક્ત કરી છે. જોકે, આ મુદ્દે 27 યુરોપિયન દેશોનો સમૂહ વહેંચાયેલો છે અને ઇઝરાયલ સામે કાર્યવાહી કરવા અંગે બહુમતી શું વિચારે છે તે હજુ સ્પષ્ટ નથી.

ઇઝરાયલે દોહામાં હુમલો કર્યો

લેયેનનું આ નિવેદન મંગળવારે કતારમાં હમાસના નેતાઓ પર થયેલા ઇઝરાયલી હુમલા પછી આવ્યું છે. હમાસના નેતાઓ યુદ્ધવિરામના અમેરિકી પ્રસ્તાવ પર વિચાર કરવા માટે દોહામાં એકઠા થયા હતા ત્યારે જ ઇઝરાયલે તેમના પર હવાઈ હુમલો કર્યો હતો.