હોર્મુઝ સ્ટ્રેટ ખૂલ્યા બાદ પણ યુદ્ધના ભણકારા! ટ્રમ્પનું ઈરાનને અલ્ટિમેટમ- ડીલ કરો નહીંતર ફરી થશે હુમલો

Trump Warns Iran: અમેરિકન પ્રમુખ ડોનાલ્ડ ટ્રમ્પ એકવાર ફરી પોતાના આક્રમક અંદાજમાં જોવા મળ્યા છે. એક તરફ તેઓ ઈરાન સાથે યુદ્ધ ખતમ થવાની ખુશીમાં વ્હાઇટ હાઉસમાં 'પાર્ટી' કરવાની વાત કરી રહ્યા છે, તો બીજી તરફ તેમણે ખુલ્લી ચેતવણી આપી છે કે જો નિર્ધારિત સમય સુધીમાં કોઈ સમજૂતી નહીં થાય, તો ફરીથી બોમ્બમારો શરૂ થઈ શકે છે. એર ફોર્સ વન પર પત્રકારો સાથે વાત કરતાં ટ્રમ્પે સ્પષ્ટ કર્યું કે તેઓ ઈરાન સાથે ચાલી રહેલા સીઝફાયરને આગળ વધારવાના મૂડમાં નથી. તેમણે કહ્યું કે, 'કદાચ હું તેને એક્સટેન્ડ ન પણ કરું. જો એવું થશે તો નાકેબંદી ચાલુ રહેશે અને અમારે ફરીથી બોમ્બ વરસાવવા પડી શકે છે.'

21 એપ્રિલની ડેડલાઇન અને મડાગાંઠ

ટ્રમ્પે સંકેત આપ્યો છે કે 21 એપ્રિલની ડેડલાઇન અત્યંત મહત્ત્વની છે. જો આ તારીખ સુધીમાં અમેરિકા અને ઈરાન વચ્ચે કોઈ નક્કર સમજૂતી નહીં થાય, તો સીઝફાયર સમાપ્ત થઈ શકે છે. જેનો અર્થ એ છે કે મધ્ય પૂર્વમાં ફરી એકવાર મોટો સૈન્ય સંઘર્ષ છેડાઈ શકે છે. જોકે, ટ્રમ્પે એવી આશા પણ વ્યક્ત કરી છે કે ડીલ થઈ જશે, પરંતુ ઈરાનનું માનવું છે કે ટ્રમ્પની વાતો પર ભરોસો કરવો મુશ્કેલ છે. આ દરમિયાન ટ્રમ્પે એ પણ સાફ કરી દીધું છે કે સીઝફાયર વધે કે ન વધે, ઈરાન પર અમેરિકાની નેવી દ્વારા કરવામાં આવેલી નાકેબંદી ચાલુ રહેશે, જે ઈરાનના ઓઇલ એક્સપોર્ટ અને અર્થતંત્ર પર દબાણ લાવવાની રણનીતિનો ભાગ છે.

આ પણ વાંચો: યુરેનિયમ આપવાનો સવાલ જ નથી: સીઝફાયર વચ્ચે ઈરાનનો અમેરિકાને ફરી જડબાતોડ જવાબ

સોમવારથી નિર્ણાયક બેઠકનો પ્રારંભ

તણાવ ઘટાડવા માટે રાજદ્વારી પ્રયાસો પણ તેજ થયા છે. એવા અહેવાલો છે કે અમેરિકા અને ઈરાનના પ્રતિનિધિઓ ટૂંક સમયમાં પાકિસ્તાનના ઇસ્લામાબાદમાં નવી વાતચીત માટે મળી શકે છે. સૂત્રોના જણાવ્યા અનુસાર, રવિવાર સાંજ સુધીમાં બંને દેશોના નેતાઓ પાકિસ્તાન પહોંચશે અને સોમવારથી મંત્રણા શરૂ થશે. અગાઉના રાઉન્ડની વાતચીત અનિર્ણિત રહી હતી, તેથી આ વખતની બેઠક ઘણી મહત્ત્વની માનવામાં આવે છે. હાલમાં દુનિયાની નજર 21 એપ્રિલ પર ટકેલી છે, કારણ કે ટ્રમ્પની 'ડબલ ગેમ' અને સૈન્ય દબાણ વચ્ચે શાંતિ સ્થપાય છે કે યુદ્ધ ફરી ભડકે છે તે જોવું રહ્યું.