પુતિનનો મોટો આદેશ: કિવ પર 72 કલાક નહીં વરસે મિસાઇલ-ડ્રોન, જાણો કેમ અટકાવ્યો હુમલો

Vladimir Putin Kyiv Ceasefire 72 Hours Order: રશિયાના રાષ્ટ્રપ્રમુખ વ્લાદિમીર પુતિને પોતાની સેનાને આગામી ત્રણ દિવસ એટલે કે 72 કલાક સુધી યુક્રેનની રાજધાની કીવ પર હુમલો ન કરવાનો આદેશ આપ્યો છે. યુએસના વિશેષ પ્રતિનિધિ સ્ટીવ વિટકોફ અને જેરેડ કુશ્નર યુક્રેન યુદ્ધ અંગે શાંતિ વાટાઘાટો માટે મોસ્કોની મુલાકાતે પહોંચ્યા હોવાથી આ નિર્ણય લેવાયો છે. રશિયન સરકારી સમાચાર એજન્સી TASS એ ક્રેમલિનના પ્રવક્તા દિમિત્રી પેસ્કોવને ટાંકીને જણાવ્યું હતું કે, પુતિન શનિવારે વિટકોફ અને કુશ્નર સાથે સમીક્ષા બેઠક કરશે.

શાંતિ વાટાઘાટો અને મુલાકાતની વિગત

અમેરિકી પ્રતિનિધિમંડળના આગમનની તૈયારીના ભાગરૂપે કીવ પર હવાઈ હુમલા રોકવાનો આદેશ જાહેર કરવામાં આવ્યો હતો. રશિયા-યુક્રેન યુદ્ધને સમાપ્ત કરવાના પ્રયાસો પુનઃશરૂ કરવાના હેતુથી અમેરિકન રાજદૂતો મોસ્કો પહોંચ્યા છે. વિમાનમથક પર રશિયન રાષ્ટ્રપતિના વિશેષ દૂત કિરીલ દિમિત્રીવે તેમનું સ્વાગત કર્યું હતું. ક્રેમલિન દ્વારા આ વાટાઘાટો બાદ મીડિયાને વિસ્તૃત માહિતી આપવામાં આવશે.

યુદ્ધ સમાપ્ત કરવાના પ્રયાસો અને વર્તમાન સ્થિતિ

રશિયા અને યુક્રેન વચ્ચે લાંબા સમયથી ચાલી રહેલું યુદ્ધ અટકવાના સંકેત આપતું નથી અને અમેરિકાના શાંતિ પ્રયાસો ધીમા પડ્યા છે.

પુતિનનું વલણ: ક્રેમલિને સ્પષ્ટ કર્યું છે કે, રશિયાની શરતો હજુ પણ સખત છે. રશિયા દાવો કરે છે તે ચાર પ્રદેશોમાંથી યુક્રેને પોતાની સેના પાછી ખેંચવી પડશે અને નાટો(NATO)માં જોડાવાની યોજના છોડવી પડશે.

ફ્રન્ટ લાઇન અને હુમલા: લગભગ 1,250 કિલોમીટર લાંબી ફ્રન્ટ લાઇન પર રશિયા ડોનબાસ પ્રદેશ પર પૂર્ણ કબજો મેળવવા ધીમે ધીમે આગળ વધી રહ્યું છે. બીજી તરફ, યુક્રેન રશિયન ઓઇલ રિફાઇનરીઓ પર લાંબા અંતરના ડ્રોન હુમલા કરી રહ્યું છે.

વિટકોફ અને કુશ્નર મોસ્કોમાં પુતિન સાથે ચર્ચા કર્યા બાદ રવિવારે કીવની મુલાકાત લે તેવી શક્યતા છે.