5 વર્ષના યુદ્ધનો આવશે અંત? પુતિન ઝેલેન્સ્કીને મળવા તૈયાર, પણ યુક્રેને આ એક શરત પૂરી કરવી પડશે!

Russia Ukrain War Update: રશિયા અને યુક્રેન વચ્ચેનું યુદ્ધ શરૂ થયાને આજે પાંચ વર્ષ થયા છે. પાંચ વર્ષથી ચાલતા આ યુદ્ધના કારણે સમગ્ર વિશ્વની નજર આ સંઘર્ષના અંત પર ટકેલી છે. આ દરમિયાન ક્રેમલિન દ્વારા સ્પષ્ટ કરવામાં આવ્યું છે કે, રશિયન રાષ્ટ્રપ્રમુખ વ્લાદિમીર પુતિન તેમના યુક્રેનિયન સમકક્ષ વોલોદિમીર ઝેલેન્સ્કીને મળવા માટે તૈયાર છે, પરંતુ તે માટે એક મહત્ત્વની શરત મૂકવામાં આવી છે.

ફાઇનલ ડીલ બાદ જ થશે મુલાકાત

ક્રેમલિનના પ્રવક્તા દિમિત્રી પેસ્કોવે જણાવ્યું હતું કે, પુતિન અને ઝેલેન્સ્કી વચ્ચે સામ-સામે મુલાકાત ત્યારે જ શક્ય બનશે જ્યારે બંને પક્ષો વચ્ચે અંતિમ સમજૂતી તૈયાર થઈ જાય. રશિયાએ સ્પષ્ટ કર્યું છે કે, પુતિન પ્રારંભિક વાટાઘાટો માટે બેઠક નહીં કરે. તેઓ માત્ર ત્યારે જ હાજર રહેશે જ્યારે અધિકારીઓ સમજૂતી પર પહોંચી ગયા હોય અને પરિણામને ઔપચારિક મંજૂરી આપવાની હોય.

મુલાકાત પ્રોડક્ટિવ હોવી જોઈએ

પેસ્કોવે પત્રકારોને જણાવ્યું કે, સૌથી મહત્ત્વની બાબત એ છે કે મળવા માટે કોઈ ચોક્કસ કારણ હોવું જોઈએ અને મુલાકાત પરિણામલક્ષી હોવી જોઈએ. રશિયાનું આ વલણ એવા સમયે આવ્યું છે જ્યારે યુદ્ધ રોકવા માટે આંતરરાષ્ટ્રીય સ્તરે રાજદ્વારી પ્રયાસો તેજ થયા છે.

આ પણ વાંચો : બંગાળના મતદાનમાં જેનો ડર હતો એ જ થયું! મુર્શિદાબાદ અને સિલિગુડીમાં ઘર્ષણ

યુક્રેન અને રશિયાની પોતાની શરતો

યુક્રેને વારંવાર કહ્યું છે કે કોઈપણ વાટાઘાટોમાં યુક્રેનની સંપ્રભુતા અને પ્રાદેશિક અખંડિતતાનું સન્માન થવું જોઈએ. બીજી તરફ મોસ્કોનો આગ્રહ છે કે વાટાઘાટોમાં રશિયાના ઐતિહાસિક વર્ણનો અને યુદ્ધ દરમિયાન મેળવેલા પ્રાદેશિક લાભોને ધ્યાનમાં લેવા જોઈએ. 

અમેરિકાની ભૂમિકા

તાજેતરના અહેવાલો મુજબ, અમેરિકી દૂતો રશિયાની મુલાકાત લેવાની અને પુતિનને મળવાની યોજના બનાવી રહ્યા છે. જોકે, કિવ (યુક્રેન) અને મોસ્કો વચ્ચે તાત્કાલિક સીધી વાતચીત થશે તેવા કોઈ સંકેતો હજુ સુધી મળ્યા નથી. યુક્રેનના રાષ્ટ્રપતિ કાર્યાલયના વડા કિરીલો બુડાનોવે સ્વીકાર્યું છે કે રશિયા, યુક્રેન અને યુએસ વચ્ચે સંપર્કો ચાલુ છે, પરંતુ હજુ સુધી કોઈ અંતિમ નિર્ણય લેવાયો નથી.