Russia Captured 5000 Square km in Ukraine: રશિયાના રાષ્ટ્રપતિ વ્લાદિમીર પુતિને દાવો કર્યો છે કે આ વર્ષે તેમની સેનાએ યુક્રેનના 5000 ચોરસ કિલોમીટર વિસ્તાર પર નિયંત્રણ સ્થાપિત કર્યું છે. સૈન્ય કમાન્ડરો સાથેની બેઠકમાં પુતિને ભારપૂર્વક કહ્યું કે, યુદ્ધના મેદાનમાં સંપૂર્ણ વ્યૂહાત્મક પહેલ રશિયા પાસે છે. અમે અમારી પકડ મજબૂત રાખી છે અને રશિયાની અંદર હુમલો કરવાના યુક્રેનના પ્રયાસોથી પરિસ્થિતિ પલટાશે નહીં.' તેમનું આ નિવેદન બંને દેશો તરફથી થઈ રહેલા સતત ડ્રોન હુમલાઓની વચ્ચે આવ્યું છે.
રશિયન સેના આગળ વધી રહી છે
પુતિને મંગળવારે પોતાના જન્મદિવસ પર ટોચના સૈન્ય કમાન્ડરો સાથેની બેઠકમાં કહ્યું કે યુક્રેનિયન સેનાઓ મોરચા પરથી પાછી હટી રહી છે. તેમણે યુક્રેન દ્વારા રશિયન ક્ષેત્રમાં કરાતા હુમલાઓને માત્ર તેમની 'ગભરામણ' ગણાવી, જે યુદ્ધની સ્થિતિ બદલવામાં મદદ કરશે નહીં.
રશિયન સેનાના જનરલ સ્ટાફ પ્રમુખ જનરલ વેલેરી ગેરાસિમોવે જણાવ્યું કે રશિયન સેનાઓ તમામ દિશાઓમાં આગળ વધી રહી છે, જ્યારે યુક્રેનિયન સેનાનું ધ્યાન માત્ર આ પ્રગતિને ધીમી કરવા પર છે. તેમણે ઉમેર્યું કે પોક્રોવસ્ક અને દ્નિપ્રોપેટ્રોવસ્ક તરફના વિસ્તારોમાં સૌથી ભીષણ લડાઈ ચાલી રહી છે.
રશિયન સૈનિકો ડોનેત્સ્ક ક્ષેત્રના મુખ્ય શહેરો સિવર્સ્ક અને કોસ્ત્યંત્યનિવકા તરફ આગળ વધી રહ્યા છે, તેમજ ઉત્તર-પૂર્વમાં કુપ્યાંસ્કમાંથી યુક્રેનિયન સેનાને હટાવી રહ્યા છે. વધુમાં, તેઓ દક્ષિણમાં ઝાપોરિઝિયા અને દ્નિપ્રોપેટ્રોવસ્કમાં પણ આગળ વધી રહ્યા છે અને ઉત્તરમાં સુમી અને ખાર્કિવ ક્ષેત્રોમાં બફર ઝોન સ્થાપિત કરવામાં પ્રગતિ કરી રહ્યા છે.
આ પણ વાંચો: ભારતે પાકિસ્તાન-રશિયા-ચીન સાથે સૂર પરોવ્યાં, અમેરિકાને કહી દીધું કે તમારી આ વાત ખોટી..
યુક્રેનના બે વધુ ગામો પર કબજો
મંગળવારે રશિયાના સંરક્ષણ મંત્રાલયે યુક્રેનના વધુ બે ગામો પર કબજો કર્યાનો દાવો કર્યો છે. આ બાબતે યુક્રેનના ટોચના કમાન્ડરનું નિવેદન છે કે મોરચો હવે 1250 કિલોમીટરથી વધુ સુધી વિસ્તરી ચૂક્યો છે. બીજી તરફ, ઑગસ્ટમાં યુક્રેનિયન સેનાએ રશિયાના આક્રમણોને નિષ્ફળ ગણાવ્યા હતા, કારણ કે રશિયન સેના આ વર્ષે કોઈ મુખ્ય યુક્રેનિયન શહેર કબજે કરી શકી નહોતી.
યુક્રેનિયન અહેવાલો મુજબ, કિવના સૈનિકોએ ડોનેત્સ્ક ક્ષેત્રમાં, ખાસ કરીને પોક્રોવસ્કના મુખ્ય લોજિસ્ટિક્સ સેન્ટર પાસે સ્થિત ડોબ્રોપિલિયા શહેરની આસપાસ પકડ મજબૂત કરી છે. યુક્રેનના રાષ્ટ્રપતિ વોલોદિમિર ઝેલેન્સકીએ કહ્યું છે કે યુક્રેનિયન સેનાએ સરહદી સુમી ક્ષેત્રમાં ફરીથી પોતાની પકડ મજબૂત કરી છે, જ્યાં રશિયાએ સ્થિતિ મજબૂત કરી હતી.
