ઈઝરાયલ-અમેરિકાએ 20 લાખ ગાઝાવાસીઓ માટે તૈયાર કર્યો પ્લાન, નામ આપ્યું 'GREAT'

Gaza Reconstitution, Economic Acceleration, and Transformation: અમેરિકી અખબારના અહેવાલ મુજબ, ડોનાલ્ડ ટ્રમ્પ વહીવટીતંત્ર અને ઈઝરાયલે ગાઝા માટે એક યોજના તૈયાર કરી છે, જેમાં 20 લાખ લોકોને કામચલાઉ રીતે ગાઝાથી હટાવવામાં આવશે. આ લોકોને જ્યાં સુધી ગાઝાનો પુનર્વિકાસ ન થાય ત્યાં સુધી ઇજિપ્ત કે કતાર જેવા દેશો અથવા પેલેસ્ટાઇનમાં જ કોઈ અન્ય જગ્યાએ મોકલવામાં આવશે. આ સમય દરમિયાન, તેમને ડિજિટલ ટોકન અને રોકડ રકમ પણ આપવામાં આવશે.

ગાઝાનું પુનર્ગઠન: 'વોલન્ટરી ડિપાર્ટર' યોજના

ગાઝામાંથી કામચલાઉ રીતે ખસેડવામાં આવેલા લોકો જ્યાં રહેશે, ત્યાં ખાવા-પીવાની વ્યવસ્થા થશે. આ ઉપરાંત, ઘરના ભાડા માટે સબસિડી પણ આપવામાં આવશે. ગાઝાના લોકોને ખસેડવાની આ યોજનાને 'વોલન્ટરી ડિપાર્ટર' કહેવામાં આવે છે, જે હેઠળ તેઓ બીજા દેશમાં જશે અથવા નક્કી કરેલા સ્થળે તેમને રાખવામાં આવશે. ગાઝાના લોકોને કુલ 4 વર્ષ સુધી બહાર રાખવાની યોજના પર કામ ચાલી રહ્યું છે. 

આ હેઠળ તેમને 4 વર્ષની ભાડા સબસિડી અને એક વર્ષ સુધી ખાવા-પીવાની વ્યવસ્થા આપવામાં આવશે. અમેરિકા અને ઇઝરાયલના વ્યૂહરચનાકારોએ આ યોજનાનું નામ પણ ખૂબ રસપ્રદ રાખ્યું છે: GREAT. અહીં GREATનો અર્થ છે, Gaza Reconstitution, Economic Acceleration, and Transformation (ગાઝાનું પુનર્ગઠન, આર્થિક ગતિ અને પરિવર્તન).

આ પણ વાંચો: અફઘાનિસ્તાનમાં 6.3ની તીવ્રતાના ભૂકંપે તબાહી મચાવી, 509 ના મોત, 1000થી વધુ ઈજાગ્રસ્ત

'ગાઝા ટ્રમ્પ રિવિએરા' વિકસાવવામાં આવશે

અમેરિકાની યોજના મુજબ, ગાઝાને 'ગાઝા ટ્રમ્પ રિવિએરા' તરીકે પ્રવાસન સ્થળમાં ફેરવવામાં આવશે. અહીં આર્ટિફિશિયલ ઇન્ટેલિજન્સથી સજ્જ સ્માર્ટ સિટી બનાવવામાં આવશે, જેમાં શાળાઓ, હોસ્પિટલો અને ઉદ્યોગો જેવી સુવિધાઓ હશે. જે લોકોને ગાઝાથી બહાર ખસેડવામાં આવશે, તેમને તેમની જમીનના બદલામાં મળેલા ડિજિટલ ટોકનનો ઉપયોગ કરીને આ એપાર્ટમેન્ટ્સમાં ફ્લેટ આપવામાં આવશે. આ બાબતે અમેરિકી વિદેશ મંત્રાલયે હજુ સુધી કોઈ સ્પષ્ટ નિવેદન આપ્યું નથી.

આ યોજના માટે અમેરિકી ફંડની જરૂર નહીં પડે, પરંતુ તેનાથી ફાયદો થશે. આ પ્રોજેક્ટ હેઠળ વિશ્વભરમાંથી 100 અબજ ડોલરનું પ્રારંભિક રોકાણ આકર્ષવામાં આવશે. અહીં ઇલેક્ટ્રિક વાહન પ્લાન્ટ્સ, ડેટા સેન્ટર્સ અને ઊંચી ઇમારતો બનાવવામાં આવશે, જેથી પ્રોજેક્ટ ભવિષ્યમાં પોતાનું ભંડોળ પોતે જ ઊભું કરી શકે.