America United Airlines Flight Windshield Breaks: 16 ઓક્ટોબરના રોજ ફ્લાઇટ UA1093માં ડેનવરથી લોસ એન્જલસ જતી ફ્લાઇટમાં તાજેતરમાં અકસ્માત થયો હતો, જેના કારણે ઇમરજન્સી લેન્ડિંગ કરવામાં આવ્યું હતું. ડેનવરથી લોસ એન્જલસ જતી યુનાઇટેડ એરલાઇન્સ બોઇંગ 737 મેક્સ 8 ફ્લાઇટમાં આ અકસ્માત થયો હતો. ફ્લાઇટ દરમિયાન વિમાનની વિન્ડશિલ્ડ તૂટી ગઈ હતી, જેમાં એક પાઇલટ ઘાયલ થયો હતો અને તાત્કાલિક ઇમરજન્સી લેન્ડિંગ કરવામાં આવ્યું હતું. આ ફ્લાઈટમાં 140 મુસાફરો અને ક્રૂ હતા. વિમાન 36,000 ફૂટની ઊંચાઈએ ઉડાન ભરી રહ્યું હતું ત્યારે અચાનક વિન્ડશિલ્ડ તૂટી ગઈ હતી. પાઇલટ ઘાયલ થયો હતો અને ઘટનાના ફોટા સામે આવ્યા છે.
વિમાને ઇમરજન્સી લેન્ડિંગ કર્યું
ત્યારબાદ વિમાનને 26,000 ફૂટ નીચે ઉતારવામાં આવ્યું હતું અને સોલ્ટ લેક સિટી એરપોર્ટ પર સુરક્ષિત રીતે લેન્ડ કરવામાં આવ્યું હતું. બાદમાં મુસાફરોને બીજા વિમાન (બોઇંગ 737 મેક્સ 9) માં સ્થાનાંતરિત કરવામાં આવ્યા હતા અને લોસ એન્જલસ લઈ જવામાં આવ્યા હતા. જો કે, અકસ્માતમાં મુસાફરોને કોઈ ઈજા થઈ નથી. બધા સુરક્ષિત છે. વિમાનમાં વિન્ડશિલ્ડ તૂટી પડવાની ઘટના એક દુર્લભ ઘટના છે. જોકે, આ ઘટનાની પ્રકૃતિ અને પાઇલટને થયેલી ઇજાઓને કારણે, આ કેસ અસામાન્ય અને ગંભીર માનવામાં આવે છે.
ઓનલાઇન સામે આવેલી તસવીરોમાં તૂટેલા કાચ પર બળી ગયેલા નિશાન અને પાઇલટના એક હાથ પર ઉઝરડા દેખાય છે. જ્યારે ક્રૂએ તૂટેલી વિન્ડશિલ્ડ જોઈ ત્યારે વિમાન સોલ્ટ લેક સિટીથી આશરે 322 કિલોમીટર દક્ષિણપૂર્વમાં હતું. જેથી વિમાનને ડાયવર્ટ કરવાનો તાત્કાલિક નિર્ણય લેવામાં આવ્યો. પાઇલટ્સે કટોકટીની કાર્યવાહી અમલમાં મૂકી અને વિમાનને સુરક્ષિત રીતે લેન્ડ કર્યું.
આ પણ વાંચો: 'બ્રાઝિલના લોકોને ભારતીયો પસંદ...', પ્રમુખ લુલાનું ભારત સાથે એલાયન્સ બનાવવા વિચાર
વિમાનની વિન્ડશિલ્ડ કેવી રીતે તૂટી?
ઉડ્ડયન નિષ્ણાતો માને છે કે કાચ અવકાશના કાટમાળ અથવા નાના ઉલ્કાપિંડથી તૂટી ગયો હશે, કારણ કે નુકસાનની પેટર્ન અને બળી ગયેલા નિશાન અસામાન્ય હતા. વિમાનના વિન્ડશિલ્ડ સામાન્ય રીતે પક્ષીઓના ટકરાવ અથવા ઉચ્ચ-દબાણના પ્રભાવનો સામનો કરવા માટે હોય છે. જો કે, કોઈપણ હાઇ-સ્પીડ અસર તેને નુકસાન પહોંચાડી શકે છે.
