કોરોનાનો કહેર: અમેરિકામાં છેલ્લા 24 કલાકમાં 1783ના મોત

વોશિંગ્ટન, તા. 10 એેપ્રિલ 2020 શુક્રવાર

મહાસત્તા અમેરિકામાં કોરોના કાળ બનીને તૂટી પડ્યો છે. છેલ્લા 24 કલાકમાં અમેરિકામાં 1783 લોકોના મોત નીપજ્યા છે. જે અત્યાર સુધીનો સૌથી મોટો આકડો છે. અને અત્યાર સુધીમાં કુલ 16 હજાર લોકો અમેરિકામાં પોતાનો જીવ ગુમાવી ચુક્યા છે. જે લોકોના મોત થયા છે તે પૈકી 11 ભારતીય પણ હતા જેમણે પોતાનો જીવ ગુમાવ્યો.

અમેરિકામાં ન્યૂયોર્ક કોરોના વાઈરસનું એપી સેન્ટર બન્યું છે. અહીંયા 1 લાખ 50 હજાર કરતા વધારે લોકો સંક્રમિત થયા છે. જ્યારે કોરોના વાઈરસનાં કારણે 6000 જેટલા લોકોએ ન્યુયોર્કમાં જીવ ગુમાવ્યો છે.

કોરોના વાઈરસને કારણે વિશ્વભરમાં મૃત્યુ આંક 95 હજારને વટાવી ગયો છે. છેલ્લા 24 કલાકમાં આ જીવલેણ વાઈરસથી 84 હજારથી વધુ લોકોને ચેપ લાગ્યો છે. ચેપગ્રસ્ત લોકોની કુલ સંખ્યા 1.6 મિલિયનથી વધુ છે. વિશ્વના વિવિધ દેશો ખરાબ સંજોગોમાં છે. અમેરિકા આ ​​રોગચાળાથી સૌથી વધુ પીડિત છે. તે જ સમયે, ઇટાલી, સ્પેન અને જર્મની પણ કોરોનાના કેરથી બાકાત નથી.

છેલ્લા 24 કલાકમાં કોરોના વાઈરસને કારણે સમગ્ર વિશ્વમાં 84,215 નવા લોકો સંક્રમિત થયા છે. તે જ સમયે, વિશ્વભરમાં 7,183 લોકો મૃત્યુ પામ્યા હતા. આ ઉપરાંત જીવલેણ કોરોના વાઈરસથી સંક્રમિત 48 હજારથી વધુ લોકો ગંભીર રીતે બીમાર છે. અત્યાર સુધીમાં, વિશ્વભરમાં કુલ 95,643 લોકો મૃત્યુ પામ્યા છે. તે જ સમયે, આ જીવલેણ વાયરસને કારણે 16,02,341 લોકોને ચેપ લાગ્યો છે.

યુકેમાં 24 કલાકમાં 881 લોકોના મોત, 4 હજારથી વધુ સંક્રમિત

બ્રિટનમાં પણ કોરોના વાઈરસની અસર વધી રહી છે. યુકેમાં છેલ્લા 24 કલાકમાં 881 લોકોનાં મોત નીપજ્યાં છે. હવે બ્રિટનમાં મૃત્યુઆંક 7,978 પર પહોંચી ગયો છે. તે જ સમયે, કોરોના વાઈરસથી ચેપગ્રસ્ત લોકોની સંખ્યા પણ 65,077 થઈ ગઈ છે. ભૂતકાળમાં, બ્રિટનમાં 4,344 નવા કોરોના વાઈરસના નવા કેસ સામે આવ્યાં હતાં. તે જ સમયે, બ્રિટન તરફથી એક સારા સમાચાર એ છે કે વડા પ્રધાન બોરીસ જોહ્ન્સનને આઈસીયુમાંથી જનરલ વોર્ડમાં ખસેડવામાં આવ્યા છે.  બ્રિટિશ વડા પ્રધાન કોરોના સંક્રમિત હોવાની પુષ્ટિ 27 માર્ચે થઇ હતી.