5 પેઢીઓ જોઈ ચૂકી છે 117 વર્ષીય કામિલે, આ ઉંમરે પણ ફિટ, લાંબા આયુષ્યનું રહસ્ય પણ જણાવ્યું
Summarized by AI; it may make mistakes. Check important info
Summarized by AI; it may make mistakes. Check important info
Qamile Mara Redefines Active Longevity: અલ્બેનિયાના એક નાનકડા ગામ ફેરાસમાં રહેતા 117 વર્ષીય કામિલે મારા હાલમાં વિશ્વના સૌથી વૃદ્ધ જીવિત મહિલા હોવાના સંભવિત દાવેદાર તરીકે આંતરરાષ્ટ્રીય સ્તરે ભારે ચર્ચામાં છે. સત્તાવાર દસ્તાવેજો અનુસાર તેમનો જન્મ 19 ઓગસ્ટ 1909ના રોજ થયો હતો. તેમણે ઓટોમન શાસન, દ્વિતીય વિશ્વયુદ્ધ અને અલ્બેનિયાની સામ્યવાદી સરમુખત્યારશાહી જેવા અનેક ઐતિહાસિક તબક્કાઓ પોતાની આંખો સમક્ષ જોયા છે. આટલી મોટી વયે પણ તેમની સ્મિત અને જીવન પ્રત્યેનો ઉત્સાહ લોકોને આશ્ચર્યમાં મૂકી દે છે.
રેકોર્ડ કરતાં જિંદગી જીવવામાં વધુ વિશ્વાસ
કામિલે મારાને એ વાતની કોઈ ચિંતા નથી કે તેમને વિશ્વના સૌથી વૃદ્ધ મહિલાનો સત્તાવાર દરજ્જો મળે છે કે નહીં. પોતાના ઘરના આંગણામાં બેસીને તેમણે જણાવ્યું હતું કે જીવન અત્યંત સુંદર છે અને તેમણે પોતાના આયુષ્યની તુલના અલ્બેનિયાની પ્રખ્યાત તોમોર પર્વતમાળા સાથે કરી હતી. તેમનું માનવું છે કે ઈશ્વરે જે વ્યક્તિ માટે જેટલું આયુષ્ય નિર્ધારિત કર્યું હોય તે તેટલું જ જીવે છે.
દસ્તાવેજોમાં 1909ની જન્મતારીખ, પેન્શન પણ થઈ ગઈ હતી બંધ
કામિલે મારાના પરિવાર પાસે તેમની ઉંમરની પુષ્ટિ કરતા 1945નું જન્મ પ્રમાણપત્ર, 1978માં જારી કરાયેલો પાસપોર્ટ અને તાજેતરનું ઓળખપત્ર ઉપલબ્ધ છે, જેમાં તેમની જન્મતારીખ 19 ઓગસ્ટ 1909 નોંધાયેલી છે. જો તેમની આ ઉંમરને સત્તાવાર રીતે માન્યતા મળે છે, તો તેઓ હાલ વિશ્વના સૌથી વૃદ્ધ મહિલા મનાતા બ્રિટનના એથેલ કેટરેહમ કરતાં બે દિવસ મોટા સાબિત થશે.
તેમના 80 વર્ષીય પુત્ર હિસેને ખુલાસો કર્યો હતો કે જ્યારે તેમની માતા 100 વર્ષના થયા ત્યારે સ્થાનિક વહીવટીતંત્રે તેઓ હજુ જીવિત છે તે વાત પર વિશ્વાસ ન બેસતાં તેમનું પેન્શન બંધ કરી દીધું હતું. પરિવારે સાક્ષીઓ અને સત્તાવાર પુરાવાઓ રજૂ કરીને તેઓ જીવિત હોવાનું સાબિત કરવું પડ્યું હતું, જે બાદ પેન્શન પુનઃ શરૂ કરાયું હતું. હાલમાં સરકારે તેમની દીર્ઘાયુના સન્માન રૂપે વિશેષ સરકારી પેન્શન પણ મંજૂર કર્યું છે.
શું છે કામિલે મારાની લાંબી ઉંમરનું રહસ્ય?
117 વર્ષની વયે પણ તેમની દિનચર્યા ખૂબ જ સક્રિય છે. તેઓ સવારે વહેલા ઊઠીને આંગણાની સફાઈ કરે છે, ફૂલોને પાણી પીવડાવે છે અને મરઘીઓને ચણ નાખે છે. ત્યાર બાદ તેઓ આરામથી કોફીની મજા માણે છે. પુત્ર સાથે બગીચામાં ટહેલવું, રસ્તામાંથી દાડમ તોડવા અને ખિસ્સામાં તુલસીના પાન રાખી તેની સુગંધ માણવી તેમની રોજીંદી આદત છે. તેમના પુત્રનો દાવો છે કે તેમની માતા ક્યારેય જીવનમાં બીમાર પડીને ડોક્ટર પાસે ગયા નથી કે તેમણે કોઈ દવાઓ પણ લીધી નથી.
પાંચ પેઢીઓનો પરિવાર અને સદી જૂની તસવીર
કામિલે મારાના પતિનું 36 વર્ષ પહેલાં અવસાન થઈ ચૂક્યું છે. સાત બાળકોની માતા રહેલા મારા આજે પોતાના પરિવારની પાંચ પેઢીઓને જોઈ ચૂક્યા છે. ઘરમાં બાળકો અને સંબંધીઓની ચહલપહલ જોઈને તેઓ હંમેશાં ખુશ રહે છે. યુવાનીના દિવસોની યાદગીરી રૂપે તેમની પાસે માત્ર એક જૂની તસવીર સચવાયેલી છે. લગભગ એક સદી જૂની આ તસવીરમાં તેઓ 18 વર્ષની વયે સફેદ સ્કાર્ફ પહેરેલા જોવા મળે છે, બિલકુલ તે જ અંદાજમાં જેવો સ્કાર્ફ તેઓ આજે પણ પહેરે છે.
