Crime Branch News : ગુજરાતમાં દિવસે ને દિવસે ડ્રગ્સનું ચલણ વધતું જાય છે. ગુજરાતના દરિયાકાંઠાના વિસ્તાર સહિત રાજ્યના મોટા શહેરોમાંથી અવાર-નવાર ડ્રગ્સનો જથ્થો ઝડપાય છે. ત્યારે અમદાવાદ ક્રાઇમ બ્રાન્ચે રવિવારે 52 લાખના એમડી ડ્રગ્સ સાથે 2 લોકોની ધરપકડ કરી છે. જોકે ડ્રગ્સનો જથ્થો મંગાવનાર અને મોકલનાર સહિત 3 લોકો ફરાર છે. પોલીસે આ અંગે ગુનો નોંધી વધુ તપાસ હાથ ધરી છે.
પ્રાપ્ત માહિતી અનુસાર અમદાવાદ ક્રાઈમ બ્રાંચ પોલીસે રવિવારે અમદાવાદ-વડોદરા એક્સપ્રેસ હાઈવે પરથી મોટી માત્રામાં એમડી ડ્રગ્સ સાથે બે વ્યક્તિઓની ધરપકડ કરી છે. બાતમીના આધારે પોલીસે પ્રતિબંધિત માદક દ્રવ્યનો 525 ગ્રામ જથ્થો જપ્ત કર્યો છે, જેની અંદાજિત બજાર કિંમત ₹52.5 લાખ છે.
આ પણ વાંચો: દાહોદમાં રૂ. 24 હજાર કરોડના વિકાસકાર્યોના લોકાર્પણ બાદ ભુજ પહોંચ્યા PM મોદી, અમદાવાદમાં સાંજે રોડ શૉ
ધરપકડ કરાયેલા લોકોની ઓળખ અજય પ્રજાપતિ (રતલામ, મધ્યપ્રદેશનો રહેવાસી) અને આનંદી ડામર (ગંગાસાગર, મધ્યપ્રદેશની રહેવાસી) તરીકે થઈ છે. તપાસમાં બહાર આવ્યું છે કે આ માદક દ્રવ્ય કથિત રીતે મંદસૌરથી કાલુ નામના વ્યક્તિ દ્વારા મોકલવામાં આવ્યું હતું અને તે અમદાવાદના વટવા સ્થિત શાહરૂખ નામના વ્યક્તિને પહોંચાડવાનું હતું.
બાતમીના આધારે પોલીસની ટીમ ઘટનાસ્થળ પહોંચી હતી અને મધ્ય પ્રદેશના રતલામથી ડ્રગ્સ આપવા માટે આવેલા અજય અને આનંદીને આવતાની સાથે જ રોકી લીધા હતા. અજયના કબજામાંથી બે પેકેટ મેફેડ્રોન ભરેલી બેગ મળી આવી હતી, જ્યારે આનંદીના કાળા લેડીઝ પર્સમાંથી ડ્રગનું બીજું એક પેકેટ મળી આવ્યું હતું.
તલાશી દરમિયાન પોલીસે અજય પાસેથી મોબાઈલ ફોન, ઓળખ કાર્ડ, ટ્રેનની ટિકિટો અને ₹2,320 રોકડા પણ જપ્ત કર્યા હતા. આનંદી પાસેથી પણ તેનો મોબાઈલ ફોન, આધાર કાર્ડ અને અન્ય વસ્તુઓ મળી આવી હતી. ફોરેન્સિક સાયન્સ લેબોરેટરીના અધિકારીઓએ સ્થળ પર જ જપ્ત કરાયેલા પદાર્થ મેફેડ્રોન હોવાની પુષ્ટિ કરી હતી. બંને આરોપીઓ વિરુદ્ધ નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટની સંબંધિત કલમો હેઠળ ગુનો નોંધવામાં આવ્યો છે.
