કુડાસણના ફ્લેટમાં આગની ઘટનામાં બેંક કર્મચારી યુવતીનું શંકાસ્પદ મોત

ફાયર બ્રિગેડ પહોંચ્યું ત્યારે મકાનનો દરવાજો અંદરથી બંધ હતો

શોર્ટ સર્કિટથી આગ લાગી હોવાનું એફએસએલનું તારણ છતાં ઇન્ફોસિટી પોલીસની તમામ થીયરી ઉપર તપાસ

ગાંધીનગર :  ગાંધીનગર શહેરના કુડાસણમાં આવેલા અક્ષત હેવન ફ્લેટમાં ગઈકાલે રાત્રે લાગેલી આગની ઘટનામાં અહીં રહેતી બેંકની કર્મચારી એવી યુવતીનું ભેદી સંજોગોમાં મોત થયું છે. જે ઘટનાને પગલે ઈન્ફોસિટી પોલીસ દ્વારા તપાસ શરૃ કરવામાં આવી છે. આગ લાગી હતી કે લગાડવામાં આવી હતી તે જાણવા માટે એફએસએલની પણ મદદ લેવામાં આવી હતી.

આ ઘટના અંગે મળતી વિગતો પ્રમાણે ગાંધીનગરના કુડાસણમાં આવેલ અક્ષત હેવન સોસાયટીના ચોથા માળે આવેલ ફ્લેટ નંબર - એચ/૪૦૨માં ગઈકાલે મોડી રાતે કોઈ અગમ્ય કારણોસર ભીષણ આગ લાગી હતી. આગના પગલે સોસાયટીમાં રહેતા રાજભાઈ દ્વારા ગાંધીનગર ફાયર બ્રિગેડને જાણ કરવામાં આવી હતી. જેથી ફાયર બ્રિગેડ સ્થળ ઉપર પહોંચ્યું હતું જ્યાં ફ્લેટનો મુખ્ય દરવાજો અંદરથી બંધ હોવાનું જણાઈ આવતાં ફાયર બ્રિગેડની ટીમ દરવાજો તોડીને ઘરમાં પ્રવેશી હતી અને બેડરૃમમાં લાગેલી આગ પર પાણીનો મારો ચલાવી મેળવી લેવાયો હતો. જો કે આ આગમાં બેડરૃમમાં પલંગ પર સૂઈ રહેલી અંકિતા મહેશભાઈ ગંગવાલનું સળગી જવાથી મોત નીપજ્યું હતું. જેના પગલે તુરંત જ જિલ્લા પોલીસ કંટ્રોલ રૃમને જાણ કરવામાં આવતા ઇન્ફોસિટી પોલીસની ટીમ સ્થળ ઉપર પહોંચી હતી અને તપાસ શરૃ કરી હતી. મૃતક યુવતી અંકિતા ગાંધીનગર નજીક આવેલા સાદરા ગામમાં બેંક ઓફ ઈન્ડિયા બ્રાન્ચમાં કામ કરતી હોવાનું પણ બહાર આવ્યું હતું તે મૂળ મધ્યપ્રદેશની હતી અને છેલ્લા થોડા મહિનાઓથી આ મકાનમાં ભાડેથી રહેવા માટે આવી હતી. ઈન્ફોસિટી પોલીસ ઇન્સ્પેક્ટર વી.આર.ખેર દ્વારા જણાવવામાં આવ્યું હતું કે તમામ થીયરી ઉપર પોલીસ દ્વારા તપાસ શરૃ કરવામાં આવી છે. આસપાસના વિસ્તારના સીસીટીવી ફૂટેજ પણ ચકાસવામાં આવી રહ્યા છે. તો અંકિતાના કોલ રેકોર્ડની ડિટેલ પણ પોલીસ દ્વારા ચકાસવામાં આવી રહી છે. એટલું જ નહીં આગની ઘટનાનું સચોટ કારણ જાણવા માટે એફએસએલની મદદ પણ લેવામાં આવી છે અને તેના દ્વારા શોર્ટ સકટથી આગ લાગી હોવાનું પણ જણાવવામાં આવ્યું છે.