સુરતના વૃદ્ધને 'ડિજિટલ અરેસ્ટ' કરી રૂ. 16 લાખ ખંખેર્યા: ભાવનગરના બાસ્કેટ બોલ પ્લેયર સહિત 3 ઝડપાયા

Surat Cyber ​​Crime: ટેક્નોલોજીના યુગમાં લોકો વિવિધ ડિજિટલ માધ્યમનો ઉપયોગ કરે છે. એવામાં સાયબર ક્રાઈમને લગતી ઘટનાઓમાં પણ વધારો થઈ રહ્યો છે.  આ સાયબર ક્રાઈમ હેઠળ ગુનેગારો વિવિધ ગુનાઈત પ્રવૃત્તિઓ જેવી કે ડિજિટલ ફ્રોડ અને ડિજિટલ અરેસ્ટ દ્વારા સામાન્ય નાગરિકોના લાખો રૂપિયા ખંખેરી લેતા હોય છે. આવો જ એક કિસ્સો સુરતમાંથી સામે આવ્યો છે, જેમાં એક વૃદ્ધને દિલ્હી પોલીસની ખોટી ઓળખ આપી વીડિયો કોલ કરીને મની લોન્ડરિંગના કેસની ધમકી આપીને ડિજિટલ અરેસ્ટ કર્યા હતા. તેમની પાસેથી 16 લાખથી વધુ રૂપિયાની ઓનલાઇન ટ્રાન્સફર કરાવ્યા હતા. હાલ  આ મામલે પોલીસે ભાવનગરના ઈન્ટરનેશનલ બાસ્કેટ બોલ પ્લેયર સહિત ત્રણ લોકોને ઝડપી પાડ્યા છે. 

જાણો શું છે મામલો

મળતી માહિતી અનુસાર, સુરતમાં રહેતા એક વૃદ્ધને વીડિયો કોલ કરીને દિલ્હી પોલીસની ઓળખ આપીને 2.50 કરોડ રૂપિયાના મની લોન્ડરિગનો કેસ થયાનું કહીને બે દિવસ સુધી ડિજિટલ અરેસ્ટ કર્યા હતા. આ ઉપરાંત તેમના બેંક માંથી એફ.ડી. તોડાવીને 16 લાખ 65 હજાર રૂપિયા ઓનલાઇન ટ્રાન્સફર કરાવ્યા હતા. આ સમગ્ર ઘટનાની જાણ વૃદ્ધે તેમની દિકરીને કરી હતી. ત્યારબાદ તેમણે આ મામલે સાયબર ક્રાઇમ સેલમાં ફરિયાદ નોંધવી હતી. પોલીસે બેંક ડિટેલના આધારે તપાસ કરતા ભાવનગરમાં રહેતા 22 વર્ષીય ઈન્ટરનેશનલ બાસ્કેટ બોલ પ્લેયર પરમવીરસિંહ, 38 વર્ષીય રાજુ પરમાર અને ક્રિષ્ના કુમાર ઝડપી પાડ્યા છે. આરોપીના બેંક એકાઉન્ટના આધારે તપાસ કરતા સામે આવ્યું છે, તેમની સામે 18 રાજ્યોમાં સાયબર ફ્રોડની ફરિયાદ નોંધાઈ છે.  

આ પણ વાંચો: કપડવંજ-મોડાસા રોડ પર બસ, ટ્રક અને ડમ્પર વચ્ચે ભીષણ અકસ્માત, બેના મોત, આઠ ઇજાગ્રસ્ત

આરોપીઓની મોડસ ઓપરેન્ડી

આરોપીએ સાયબર ક્રાઈમ, CBI અધિકારી, કસ્ટમ અધિકારી અથવા પોલીસ અધિકારીનો સ્વાંગ રચી લોકોને વીડિયો અથવા ઓડિયો કોલ કરતા હતા. જેમાં તે કહેતા કે, તમે કોઈ પાર્સલ વિદેશ મોકલ્યું છે અથવા વિદેશથી આવ્યું છે, જેમાં ગેરકાયદે માલસામાન, ડ્રગ્સ, નકલી પાસપોર્ટ અથવા કોઈ પ્રતિબંધિત ચીજવસ્તુ છે. આવા કિસ્સાઓમાં ભોગ બનનારને સ્કાઇપ અથવા અન્ય વીડિયો કોન્ફરન્સિંગ પ્લેટફોર્મ પર હાજર રહેવા મજબૂર કરી તેઓને પોતાના ઘરમાં ડિજિટલી અરેસ્ટ કરીને સમાધાન અને કેસ બંધ કરવા માટે પૈસાની માંગ કરતા હતા. આવા કિસ્સાઓમાં ભોગ બનનાર લોકો ગભરાઈને કેસ પતાવવાનો પ્રયાસ કરે છે અને નાણા ચૂકવે છે.

'ડિજિટલ અરેસ્ટ' ફ્રોડથી બચવા માટે શું ધ્યાન રાખવું?

ડિજિટલ અરેસ્ટ ફ્રોડ એ સાયબર ગુનેગારો દ્વારા ઉપયોગમાં લેવાતી એક સામાન્ય યુક્તિ છે, જેમાં પીડિતને ડરાવી-ધમકાવીને પૈસા પડાવવામાં આવે છે. આવા ફ્રોડથી બચવા માટે કેટલાક મહત્ત્વના મુદ્દાઓનું ધ્યાન રાખવું જરૂરી છે.

સત્તાવાર અધિકારીઓની ઓળખની ચકાસણી:

પોલીસ, CBI, ED, બેંક કે કોઈપણ સરકારી એજન્સી ક્યારેય તમને ફોન પર કે વીડિયો કોલ પર તમારી બેંક વિગતો, OTP કે અંગત માહિતી માંગશે નહીં. જો કોઈ વ્યક્તિ પોતાને સરકારી અધિકારી તરીકે ઓળખાવે અને તમને ધમકાવે કે તાત્કાલિક પૈસા ટ્રાન્સફર કરવાનું કહે, તો તે ફ્રોડ છે. આવા કિસ્સાઓમાં, ફોન કટ કરીને સંબંધિત વિભાગની સત્તાવાર વેબસાઇટ પરથી નંબર શોધીને તેની ખરાઈ કરો.

ડિજિટલ અરેસ્ટ જેવું કંઈ નથી:

તમને ડિજિટલી અરેસ્ટ કરવામાં આવ્યા છે અથવા તમે કોઈ 'સિક્રેટ રૂમ'માં છો એવો દાવો કરનાર કોઈ પણ વ્યક્તિ કે વીડિયો કોલ પર વિશ્વાસ ન કરો. કાયદેસરની ધરપકડ હંમેશા શારીરિક રીતે અને સત્તાવાર પ્રક્રિયા દ્વારા થાય છે, ડિજિટલી નથી હોતી.

આ પણ વાંચો: મુંબઈમાં લોકલ ટ્રેનમાં 5 મોત બાદ તંત્ર સફાળું જાગ્યું, ઓટોમેટિક દરવાજા લગાવવાનો નિર્ણય

પાર્સલ સંબંધિત ધમકીઓ:

જો તમને કોઈ પાર્સલ વિદેશ મોકલ્યું હોવાનું કે તમને મળ્યું હોવાનું અને તેમાં ગેરકાયદે વસ્તુઓ હોવાનું કહીને ધમકાવવામાં આવે, તો તેના પર વિશ્વાસ ન કરો. આ એક સામાન્ય યુક્તિ છે.

તાત્કાલિક પૈસા ટ્રાન્સફર કરવાની માંગણી

કોઈપણ સરકારી એજન્સી કે બેંક ક્યારેય તમને ફોન પર તાત્કાલિક પૈસા ટ્રાન્સફર કરવાનું કહેશે નહીં. જો આવી માંગણી થાય, તો તે સ્પષ્ટપણે ફ્રોડ છે.

અજાણી લિંક કે એપ્લિકેશન

કોઈ અજાણી લિંક પર ક્લિક ન કરો કે Skype, Telegram, WhatsApp જેવી એપ્સ દ્વારા અજાણી વ્યક્તિ સાથે વીડિયો કોલ પર જોડાઈને તેમની વાતમાં ન આવો.

આ પણ વાંચો: 'નાયક' ફિલ્મની જેમ હીરો બનવા નીકળેલા મંત્રીએ છેવટે ડૉક્ટરની માફી માંગી, સોશિયલ મીડિયામાં ટ્રોલ

શંકા જાય તો શું કરવું?

• જો તમને સહેજ પણ શંકા જાય, તો તરત જ કોલ કટ કરો. 

• આવી કોઈ પણ ઘટના બને તો તાત્કાલિક સાયબર ક્રાઈમ હેલ્પલાઇન નંબર 1930 પર જાણ કરો અથવા www.cybercrime.gov.in પર ઓનલાઈન ફરિયાદ નોંધાવો.

• તમારી બેંકનો સંપર્ક કરીને તમારા ખાતામાં કોઈ શંકાસ્પદ પ્રવૃત્તિ થઈ હોય તો તેની જાણ કરો.

આ સાવચેતીઓ અપનાવીને તમે આવા ડિજિટલ ફ્રોડનો ભોગ બનવાથી બચી શકો છો.