વ્યાજખોર મહિલાએ બહેનપણીને આપેલ રકમની કડક ઉઘરાણી

વડોદરા, તા.1 ભાયલીની વેપારી મહિલાને વ્યાજે આપેલી રકમ વ્યાજ સહિત ચૂકવી દીધી  હોવા છતાં કડક ઉઘરાણી કરતી અન્ય મહિલા વિરુધ્ધમાં વ્યાજ અધિનિયમ હેઠળ પોલીસે ગુનો નોંધ્યો હતો.

ભાયલી-કેનાલરોડ પર પ્રકૃતિ ગ્રીન ખાતે રહેતા વૈશાલી અશ્વિનભાઇ પ્રજાપતિએ ભાયલીમાં લીલા દરવાજા ખાતે રહેતી હેતલ વિપુલકુમાર પટેલ સામે તાલુકા પોલીસ સ્ટેશનમાં નોંધાવેલી ફરિયાદમાં જણાવ્યું છે કે હું મકાન લે-વેચનું કામ કરું છું તેમજ પ્રોવિઝન સ્ટોર ચલાવું છું. વર્ષ-૨૦૧૬માં મારે પુત્રની કોલેજમાં ફી ભરવાની હોવાથી તેમજ નાણાંની જરૃરિયાત હોવાથી મારા પ્રોવિઝન સ્ટોરમાં આવતા હેતલબેન સાથે મિત્રતા થઇ હોવાથી તેમને મારી નાણાંકીય ભીડની વાત કરી હતી.

હેતલબેને તે સમયે મને વાર્ષિક ૩૬ ટકા વ્યાજે આપવાની વાત કર્યા બાદ મેં છૂટક છૂટક કુલ રૃા.૧૦.૫૦ લાખ વ્યાજ પર લીધા હતાં. વર્ષ-૨૦૧૭થી વ્યાજના આપેલા રોકડ તેમજ પ્રોવિઝન સ્ટોરમાંથી તા.૧૦ જાન્યુઆરીથી તા.૧૧ નવેમ્બર ૨૦૨૪ સુધી રૃા.૨.૨૯ લાખનો સામાન હેતલબેન લઇ ગયા  હતાં. આ ઉપરાંત રૃા.૧૧.૨૭ લાખ છૂટક છૂટક રોકડા ચૂકવ્યા હતાં અને રૃા.૯૦ હજાર ચેકથી આપ્યા હતાં. હેતલબેનને કુલ રૃા.૧૫.૪૬ લાખની ચૂકવણી કરી હોવા છતાં તેઓ વધુ રકમની માંગણી કરતી હતી.

બાદમાં હેતલબેને સમાધાન માટે કહેતા તા.૨૮ માર્ચ ૨૦૨૫ના રોજ રૃા.૧ લાખ અને રૃા.૩ લાખના ચેક મેં આપી સમાધાન કરી રૃા.૧ લાખ વાઉચર પર સહી કરી રોકડા આપ્યા હતા પરંતુ મારો ચેક પરત કર્યો નથી. આમ વ્યાજે લીધેલા રૃા.૧૦.૫૦ લાખની સામે રૃા.૧૫.૪૬ લાખ ચૂકવ્યા છતાં વ્યાજખોર હેતલબેન દ્વારા વધુ રકમની માંગણી કરી માનસિક ત્રાસ આપે છે. ઉપરોક્ત ફરિયાદના પગલે પોલીસે વધુ તપાસ હાથ ધરી છે.