સાબરમતી જેલમાં કેદીના મોતના કેસમાં વળાંક, સ્ટાફ પર હત્યાનો આરોપ, FIR પણ નોંધાઈ

Sabarmati Central Jail Ahmedabad : અમદાવાદ ખાતે આવેલી સાબરમતી સેન્ટ્રલ જેલની ન્યાયિક કસ્ટડીમાં ગત મે મહિનામાં મૃત્યુ પામેલા 33 વર્ષીય કેદીના પરિવારે જેલના સ્ટાફ પર ગંભીર આરોપ લગાવ્યો છે કે તેમણે તેમના ભાઈને જીવલેણ હુમલો કરીને મારી નાખ્યો હતો. મૃતકના મોટા ભાઈની ફરિયાદના આધારે રાણીપ પોલીસે ગેર-ઈરાદાપૂર્વક હત્યા અને દુષ્પ્રેરણાનો ગુનો નોંધીને તપાસ શરૂ કરી છે.

શું છે સમગ્ર મામલો?

બેહરામપુરાના રહેવાસી પ્રવીણકુમાર પરમાર (43) દ્વારા દાખલ કરવામાં આવેલી FIR મુજબ તેમનો નાનો ભાઈ અજયભાઈ પરમાર અમદાવાદની સેન્ટ્રલ જેલમાં ભરણપોષણના કેસમાં સજા કાપી રહ્યો હતો. કલોલ કોર્ટ દ્વારા ભરણપોષણના ₹1.71 લાખ ન ચૂકવવા બદલ અજયભાઈને 22 મે 2024 ના રોજ ન્યાયિક કસ્ટડીમાં મોકલવામાં આવ્યા હતા.

પ્રવીણકુમારે જણાવ્યું કે તેઓ છેલ્લે 24 મે ના રોજ જેલમાં તેમના ભાઈને મળ્યા હતા અને તેમને ખાતરી આપી હતી કે ટૂંક સમયમાં બાકી રકમ કોર્ટમાં જમા કરાવી દેવામાં આવશે. જોકે 26 મેના રોજ તેમને દાણીલીમડા પોલીસ તરફથી ફોન આવ્યો કે તેમના ભાઈ કસ્ટડીમાં બીમાર પડ્યા છે અને તેમને સિવિલ હોસ્પિટલ અમદાવાદ લઈ જવામાં આવ્યા છે.

આ પણ વાંચો: MP-રાજસ્થાનમાં કફ સિરપથી બાળકોના મોત બાદ ગુજરાત સરકાર પણ જાગી, 500થી વધુ સ્થળે તપાસ

કોર્ટમાં આપેલા પોતાના નિવેદનમાં પ્રવીણકુમારે જણાવ્યું હતું કે, 'જ્યારે અમે સિવિલ હોસ્પિટલ પહોંચ્યા, ત્યારે અમને કહેવામાં આવ્યું કે મારા ભાઈનું સારવાર દરમિયાન મૃત્યુ થયું છે અને તેમનો મૃતદેહ પોસ્ટમોર્ટમ રૂમમાં રાખવામાં આવ્યો છે. જ્યારે અમે મૃતદેહ જોયો, ત્યારે અમને તેમની છાતી અને પાંસળીઓ પર ઈજાના અનેક નિશાન જોવા મળ્યા.'

પોસ્ટમોર્ટમ રિપોર્ટમાં 29 ઈજાઓનો ઉલ્લેખ

પરિવારનો આરોપ છે કે પોસ્ટમોર્ટમ રિપોર્ટ મુજબ અજયભાઈને 29 ઈજાઓ થઈ હતી, જેમાં પાંસળીના ફ્રેક્ચર પણ સામેલ છે. પરિવારનું માનવું છે કે આ ઈજાઓ કસ્ટોડિયલ હુમલાને કારણે થઈ છે. ફરિયાદમાં આરોપ છે કે 22 થી 26 મે 2024 ની વચ્ચે કોઈ કારણસર ડ્યુટી પર હાજર જેલ સ્ટાફ દ્વારા તેમને માર મારવામાં આવ્યો હતો, જે આખરે તેમના મૃત્યુનું કારણ બન્યું.

પોસ્ટમોર્ટમ બાદ મૃતદેહ પરિવારને સોંપવામાં આવ્યો હતો. પ્રવીણકુમારે દાવો કર્યો હતો કે તેમણે બાદમાં એક તબીબી નિષ્ણાતની સલાહ લીધી, જેમણે પુષ્ટિ કરી કે ઓટોપ્સીમાં ઉલ્લેખિત ઈજાઓ શારીરિક હુમલા સાથે સુસંગત છે. ત્યારબાદ તેમણે કથિત કસ્ટોડિયલ હિંસાની વિગતવાર તપાસની માંગ સાથે રાણીપ પોલીસનો સંપર્ક કર્યો હતો.

પોલીસ તપાસ શરૂ

ફરિયાદના આધારે પોલીસે ગુનો નોંધીને તપાસ શરૂ કરી દીધી છે. પોલીસ અધિકારીઓએ જણાવ્યું કે કેદીના મૃત્યુના સંજોગો અને આ ઘટનામાં કથિત રીતે સંડોવાયેલા જેલ કર્મચારીઓની ઓળખ કરવા માટે વધુ તપાસ ચાલી રહી છે.