નેહરુ સરદાર પટેલનો વારસો દબાવવા માંગતા હતા, PM મોદીએ SoU બનાવડાવ્યું: વડોદરામાં રાજનાથ સિંહનું નિવેદન
Updated: Dec 2nd, 2025
GS TEAM
Defence Minister Rajnath Singh Statement: સંરક્ષણ મંત્રી રાજનાથ સિંહે વડોદરાના સાધલી ખાતે 'સરદાર@150 રાષ્ટ્રીય એકતા પદયાત્રા' અંતર્ગત યોજાયેલી 'સરદાર ગાથા'માં સંબોધન કરતાં કોંગ્રેસ અને પ્રથમ વડાપ્રધાન જવાહરલાલ નેહરુ પર ગંભીર આક્ષેપો કર્યા હતા. તેમણે દાવો કર્યો કે, 'નેહરુએ સરદાર વલ્લભભાઈ પટેલના વારસાને દબાવવાનો પ્રયાસ કર્યો હતો, જ્યારે વડાપ્રધાન નરેન્દ્ર મોદીએ સ્ટેચ્યુ ઑફ યુનિટી (SoU) બનાવીને તેમને યોગ્ય સન્માન આપ્યું.'
બાબરી મસ્જિદ અને સોમનાથ મંદિર મુદ્દે આક્ષેપો
સરદાર પટેલ અને નેહરુ વચ્ચેના વિચારભેદોના સંરક્ષણ મંત્રી રાજનાથ સિંહે ઉદાહરણો રજૂ કર્યા હતા. તેમણે દાવો કર્યો કે 'જવાહરલાલ નેહરુ જાહેર ભંડોળથી અયોધ્યામાં બાબરી મસ્જિદ બનાવવા માંગતા હતા, પરંતુ સરદાર વલ્લભભાઈ પટેલે આ પ્રસ્તાવને આગળ વધતા અટકાવ્યો હતો.'
તેમણે કહ્યું કે સોમનાથ મંદિરનું પુનર્નિર્માણ જનતાના ભંડોળથી થયું હતું. તેવી જ રીતે, અયોધ્યામાં રામ મંદિર સંપૂર્ણપણે જનતાના સમર્થનથી બન્યું છે, જે સાચા ધર્મનિરપેક્ષતાનું ઉદાહરણ છે.
સરદાર પટેલના વારસાને દબાવવાનો પ્રયાસ
સરદાર પટેલના વારસા અંગે સંરક્ષણ મંત્રી રાજનાથ સિંહે દાવો કર્યો કે, 'નેહરુએ સરદાર પટેલના નિધન પછી તેમના સ્મારક માટે એકઠા થયેલા જાહેર નાણાંને કૂવાઓ અને રસ્તાઓ બનાવવા પર ખર્ચવાનું સૂચન કર્યું હતું, જે તેમના વારસાને દબાવવાનો પ્રયાસ હતો. સરદાર પટેલ ખરેખર ઉદાર અને ન્યાયી નેતા હતા જેમણે ક્યારેય તુષ્ટિકરણની રાજનીતિ કરી ન હતી. નેહરુએ પોતાને ભારત રત્નથી સન્માનિત કર્યા હતા, પરંતુ સરદાર પટેલને તે સમયે તે મળ્યું ન હતું. આ સ્પષ્ટપણે દર્શાવે છે કે તે સમયે તેમના વારસાને અવગણવામાં આવ્યો હતો.'
સંરક્ષણ મંત્રી રાજનાથ સિંહે કહ્યું કે, '1946ની કોંગ્રેસ રાષ્ટ્રપતિની ચૂંટણીમાં, મોટાભાગના પ્રસ્તાવો સરદાર પટેલના પક્ષમાં હતા, પરંતુ મહાત્મા ગાંધીની વિનંતી પર સરદાર પટેલે પોતાનું નામાંકન પાછું ખેંચી લીધું, અને નેહરુ રાષ્ટ્રપતિ બન્યા, ત્યારબાદ તે વડાપ્રધાન બન્યા.'
PM મોદીએ આપ્યું સન્માન
વડાપ્રધાન મોદી અંગે સંરક્ષણ મંત્રી રાજનાથ સિંહે કહ્યું કે, 'અમુક રાજકીય શક્તિઓ વર્ષોથી સરદાર પટેલના વારસાને દબાવવાનો પ્રયાસ કરી રહી હતી. સ્ટેચ્યુ ઓફ યુનિટીનું નિર્માણ કરીને વડાપ્રધાન નરેન્દ્ર મોદીએ સરદાર પટેલને તે સન્માન આપ્યું જે તેઓ પહેલા મેળવવાના હતા.'
કાશ્મીર અને ઓપરેશન સિંદૂર
કાશ્મીર અને ઓપરેશન સિંદૂર વીશે સંરક્ષણ મંત્રી રાજનાથ સિંહે કહ્યું કે, 'જો કાશ્મીરના વિલીનીકરણ અંગે સરદાર પટેલની સલાહ પર ધ્યાન આપવામાં આવ્યું હોત, તો કાશ્મીર મુદ્દો દેશ માટે લાંબા ગાળાનો બોજ ન બન્યો હોત. સરદાર પટેલે જરૂર પડ્યે મક્કમ પગલાં લીધાં, જેમ કે હૈદરાબાદના વિલીનીકરણમાં લેવાયેલો કઠિન નિર્ણય. મોદી સરકારે ઓપરેશન સિંદૂરમાં પણ આ મજબૂત વલણનો ઉપયોગ કર્યો હતો. ભારત કોઈને ઉશ્કેરતું નથી, પરંતુ ઉશ્કેરવામાં આવે ત્યારે કેવી રીતે જવાબ આપવો તે સારી રીતે જાણે છે.'
