| પ્રતીકાત્મક તસવીર |
Rajkot Crime News: રાજકોટના જંગ્લેશ્વર વિસ્તારમાંથી સગીરા પર સામૂહિક દુષ્કર્મની એક અત્યંત ચોંકાવનારી અને દર્દનાક ઘટના સામે આવી છે. સોશિયલ મીડિયા પર મિત્રતા કેળવીને 15 વર્ષની કિશોરીને પ્રેમજાળમાં ફસાવવામાં આવી હતી. ત્યારબાદ અલગ-અલગ સ્થળોએ 7 શખ્સોએ સગીરા પર દુષ્કર્મ આચર્યું હોવાની ફરિયાદ ભક્તિનગર પોલીસ સ્ટેશનમાં નોંધાતા સમગ્ર પંથકમાં ચકચાર મચી ગઈ છે.
કિશોરીની સગીર બહેનપણીએ પરિચય કરાવ્યા
પીડિતાની જ એક બહેનપણીએ તેને મોબાઈલ ફોન આપીને મુખ્ય આરોપી ડેવિલ સાથે સોશિયલ મીડિયા પર સંપર્ક કરાવ્યો હતો. ડેવિલે સગીરાનો વિશ્વાસ જીતી લીધા બાદ, ગત 29 માર્ચ 2026ના રોજ પોતાના સાથીદાર સાહીલ ઉર્ફે ઝેરીને બાઇક લઈને તેને તેડવા મોકલ્યો હતો. સાહીલ સગીરાને જંગલેશ્વર ખાતે પોતાના ઘરે લઈ ગયો હતો, જ્યાં ડેવિલે તેને ડરાવી-ધમકાવીને અવારનવાર હવસનો શિકાર બનાવી હતી.
‘પોલીસ’ હોવાની ખોટી ઓળખ આપી હવસ સંતોષી
ગુનાહિત સિલસિલો અહીં જ ન અટકતા, સગીરાની તે જ બહેનપણીએ ત્યારબાદ તેનો પરિચય મિહીર કુગશીયા નામના શખ્સ સાથે કરાવ્યો હતો. ગત 6 મે 2026ના રોજ મિહીર સગીરાને નવા બસ સ્ટેન્ડ પાછળ આવેલી એક હોટલમાં લઈ ગયો હતો. ત્યાં તેણે પોતે ‘પોલીસ’ હોવાની ખોટી ઓળખ આપી, ડર બતાવીને સગીરા પર અવારનવાર દુષ્કર્મ આચર્યું હતું. નોંધનીય છે કે આરોપી મિહીર અગાઉ પણ 6 વખત નકલી પોલીસ તરીકે ઝડપાઈ ચૂક્યો છે.
હોટલમાં લઈ જઈ દુષ્કર્મ
આ નરપિશાચોની જાળમાં સગીરા વધુને વધુ ફસાતી ગઈ, જેમાં પડોશમાં રહેતા રજાક ઠેબાએ પણ ઇન્સ્ટાગ્રામના માધ્યમથી સંપર્ક વધાર્યો હતો. 16 મે 2026ના રોજ રજાક સગીરાને પોતાની એક્ટિવા પર બેસાડીને હોટલમાં લઈ જઈ દુષ્કર્મ ગુજાર્યું હતું. આ ઉપરાંત, સુલતાન સલીમભાઇ સવાણ નામના અન્ય એક શખ્સે પણ સગીરાની જાતીય સતામણી કરી હોવાનું ખુલ્યું છે.
ચાલતી કારમાં ગેંગરેપ
અત્યાચારની પરાકાષ્ઠા તો ત્યારે આવી જ્યારે 17 મે 2026ના રોજ આરોપી રજાક ઠેબા, ધવલ અને આશીફ શાહમદાર સગીરાને એક સફેદ રંગની સ્વિફ્ટ કારમાં બેસાડી ગયા હતા. ચાલતી કારમાં રજાકે સગીરાને છરી બતાવી જાનથી મારી નાખવાની ધમકી આપી હતી અને આ ત્રણેય નરાધમોએ કારની અંદર જ સગીરા પર સામૂહિક દુષ્કર્મ આચર્યું હતું.
BNS અને પોક્સો (POCSO) એક્ટ હેઠળ 8 સામે ગુનો
સમગ્ર મામલો પ્રકાશમાં આવ્યા બાદ ભોગ બનનાર સગીરાના પિતાએ ભક્તિનગર પોલીસ મથકમાં ન્યાયની ગુહાર લગાવી છે. પોલીસે એક સગીરા (બહેનપણી) સહિત ડેવિલ, સાહીલ, મિહીર, રજાક, ધવલ, આશીફ અને સુલતાન એમ કુલ 8 આરોપીઓ સામે BNS અને પોક્સો (POCSO) એક્ટની ગંભીર કલમો હેઠળ ગુનો નોંધી, ઉચ્ચ અધિકારીઓની દેખરેખ હેઠળ તમામ નરાધમોને ઝડપી પાડવા ચક્રો ગતિમાન કર્યા છે.
