સોલામાં કન્ટ્ર્ક્શન સાઇટ પર વીજકરંટ લાગતા ત્રણ કામદારોના મોત નીપજ્યા

શહેરના સોલા બ્રીજ પાસે બની રહેલી એક કન્ટ્રક્શન સાઇટ પર વીજકરંટ લાગતા કામ કરી રહેલા ત્રણ કામદારોના ઘટના સ્થળે જ કમાકમાટી ભર્યા મોત નીપજ્યા હતા. આ સમગ્ર ઘટનામાં સાઇટ સુપરવાઇઝરની બેદરકારી હોવાનો આક્ષેપ કરતા સોલા પોલીસે ફોરેન્સિક એક્સપર્ટની મદદથી તપાસ શરૂ કરી છે.

સાઇટ સુપરવાઇઝરની બેદરકારી હોવાનો અન્ય કામદારોએ આક્ષેપ કર્યોઃ ફોરેન્સિક તપાસ કરવામાં આવી

સોલામાં આવેલી મારૂતી હોસ્પિટલ પાસે આત્મન ગ્રાન્ડયુઅર સાઇટ પર શુક્રવારે સાંજના સમયે કામદારો કામ કરી કરતા હતા. ત્યારે સાઇટમાં એક જગ્યા પર ત્રણ કામદારોને વીજકરંટ લાગતા બેભાન થઇ ગયા હતા. ત્યાં હાજર લોકોએ વીજકરંટ બંધ કરીને ત્રણેયને સારવાર માટે નજીકની હોસ્પિટલમાં મોકલ્યા હતા. જ્યાં તબીબોએ તેમને મૃત જાહેર કર્યા હતા. ત્રણેય મૃતકના નામ શીવાલાલ બામણિયા, વિકેશ પારગી અને રાહુલ બામણીયા (તમામ રહે. રાજસ્થાન) હોવાનું જાણવા મળ્યું હતું. સ્થાનિક કામદારોએ આરોપ લગાવ્યો હતો કે સાઇટ સુપરવાઇઝરની બેદરકારીને કારણે આ ઘટના બની હતી. ત્યારે પોલીસે નિવેદન નોંધવાની સાથે સ્થળ ફોરેન્સિક એક્સપર્ટની મદદથી તપાસ શરૂ કરી છે. સોલા પોલીસ સ્ટેશનના અધિકારીએ જણાવ્યું કે તપાસમાં બેદરકારી સામે આવશે તો આ અંગે કાયદેસરની કાર્યવાહી કરવામાં આવશે.