જામનગર નજીક નકલી ઇંગ્લિશ દારૂ બનાવવાની મિનિ ફેક્ટરી ઝડપાઇ

નેવી મોડા ગામના વાડી વિસ્તારમાં LCB ટીમનો દરોડો : જામનગર અને રાજસ્થાનના 6 શખ્સોને દારૂ બનાવવાની સામગ્રી, કાચની બોટલ ડુપ્લીકેટ સ્ટિકર સહિત રૂ. 7.28 લાખના મુદ્દામાલ સાથે પકડીને કાર્યવાહી

જામનગર, : જામનગર નજીક નેવી મોડા ગામમાં નકલી ઇંગલિશ દારૂ બનાવવાની મિનિ ફેક્ટરી એલસીબી ની ટુકડીએ પકડી પાડી છે, અને જામનગર તેમજ રાજસ્થાન સહિતના છ શખ્સોની અટકાયત કરી લઈ બનાવટી વિદેશી દારૂ બનાવવા માટેની સાધન સામગ્રી, દારૂ ના પાઉચ, કાચની બોટલ, તથા સ્ટીકર, મિશ્રણયુક્ત પ્રવાહી સહિત રૂપિયા 7.28 લાખની માલમતા કબજે કરી છે, અને તમામ છ શખ્સોની ઝીણવટ ભરી પૂછપરછ હાથ ધરી છે.

જામનગરની લોકલ ક્રાઈમ બ્રાન્ચની ટીમને ચોક્કસ બાતમી મળી હતી કે જામનગર નજીક નેવી મોડા ગામમાં રહેતા હાર્દિકસિંહ જાડેજા નામના શખ્સની વાડીમાં મકાનની અંદર નકલી દારૂ બનાવવાની ફેક્ટરી ચલાવવામાં આવી રહી છે, અને જામનગર તથા રાજસ્થાનના કેટલાક શખ્સો એકત્ર થઈને ગેરકાયદેસર રીતે નકલી દારૂ બનાવી તેનું જામનગર અને આસપાસના વિસ્તારમાં વેચાણ કરે છે. બાતમીને આધારે એલસીબીના પી.આઈ. વી.એમ. લગારિયા અને તેઓની ટીમે દરોડો પાડયો હતો.  જે દરોડા દરમિયાન 6 શખ્સો નકલી દારૂ બનાવવાનું કારસ્તાન ચલાવી રહેલા નજરે પડયા હતા. જેઓ કેમિકલ જેવું પ્રવાહી કે જેમાં ભેળસેળ કરીને ઇંગ્લિશ દારૂની બાટલી તેમ જ વગેરે પર ડુપ્લીકેટ સ્ટીકરનો ઉપયોગ કરી નકલી દારૂ તૈયાર કરવામાં આવી રહ્યો હોવાનું ધ્યાનમાં આવ્યું હતું. જેથી એલસીબીની ટુકડીએ નકલી દારૂ બનાવવાની ફેક્ટરી ચલાવી રહેલા હરદીપસિંહ ઉર્ફે લાલો મહાવિરસિંહ ઉર્ફે સુખદેવસિંહ ઉર્ફે સુખુભા જાડેજા ગીરા (ઉ.વ. 32, રહે. મોમાઇનગર શેરી નંબર-5, સીટી બસ સ્ટોપની સામે, જામનગર, મુળ- નેવીમોડા તા.જી. જામનગર), શ્રીરાજસિંહ ઉર્ફે  સિધ્ધરાજસિંહ ઉપેન્દ્રસિંહ ઝાલા ગીરા (ઉ.વ. 25, રહે. રામેશ્વરનગર, નિર્મળનગર શેરી નંબર-3 જામનગર),  અર્જુનસિંગ તેજસિંગ સોઢા રાજપુત (ઉ.વ. 30, રહે. ચોહટન, મેધવાલોકા વાસ, તા.ચોહટન જી.બાડમેર રાજસ્થાન), સુર્યપ્રતાપસિંગ ભાનુપ્રતાપસિંગ રાઠોડ રાજપુત (ઉ.વ. 28, રહે. લોરડીગામ તા.વિજયનગર જી.બ્યાવર રાજસ્થાન), સૈતાનસિંગ ઉકારસિંગ રાઠોડ રાજપુત (ઉ.વ. 43, રહે. બરેલાગામ તા.વિજયનગર જી.બ્યાવર રાજસ્થાન), અને સાવરલાલ ધેવરચંદ્ર મેવાળા કલાળ (ઉ.વ. 24, રહે. બડલાગામ તા.હુરડા થાના ગુલાબપુરી જી.ભીલવાડા રાજસ્થાન) વગેરેની અટકાયત કરી હતી.