જામનગર: બુટલેગરની ચબરાકી પર પોલીસ ભારે પડી, બોલેરોમાં બનાવેલા ચોરખાનામાંથી દારૂ ઝડપાયો

Liquor Seizure In Jamnagar: જામનગર શહેરમાં દારૂની હેરાફેરી કરવા માટે બુટલેગરો અવનવા પેંતરા અજમાવી રહ્યા છે, પરંતુ જામનગર સીટી બી. ડિવિઝન પોલીસની સતર્કતાએ આવા જ એક ‘ચબરાક’ બુટલેગરના પ્લાન પર પાણી ફેરવી દીધું છે. રામેશ્વર નગર વિસ્તારમાં પાર્ક કરેલી એક બોલેરો પીકઅપમાં ખાસ ચોરખાનું બનાવી છુપાવેલો દારૂનો જથ્થો પોલીસે શોધી કાઢ્યો છે.

ખાલી બોલેરોમાં છુપાયેલું હતું રહસ્ય

મળતી માહિતી અનુસાર, જામનગર સીટી બી. ડિવિઝન પોલીસને ચોક્કસ બાતમી મળી હતી કે વિનાયક પાર્કમાં ઊભેલી એક બોલેરો પીકઅપમાં દારૂનો જથ્થો છુપાવવામાં આવ્યો છે. પોલીસ જ્યારે ઘટનાસ્થળે પહોંચી ત્યારે પ્રથમ દ્રષ્ટિએ બોલેરો એકદમ ખાલીખમ્મ જણાઈ હતી. જોકે,પોલીસે ઝીણવટભરી તપાસ શરૂ કરી હતી. જ્યારે બોલેરોના સાઇડના પતરાં અને બોડીની તપાસ કરતા તેમાં બનાવેલું એક ચોરખાનું મળી આવ્યું હતું. પોલીસે આ ખાનું ખોલતા અંદરથી પ્લાસ્ટિકના ત્રણ મોટા થેલાઓમાં છુપાવેલી વિદેશી દારૂની બોટલો મળી આવી હતી. હાલ પોલીસે દારૂ અને બોલેરો સહિત કુલ 4,39,000 રૂપિયાનો મુદ્દામાલ કબજે કર્યો છે.

આ પણ વાંચો: ધ્રોલની હત્યા કેસનો આરોપી જામીન ઉપર છૂટ્યા પછી નાસી ગયો હતો: જેને ઝડપી લેવાયો

પોલીસ દરોડા દરમિયાન આરોપી બુટલેગર સ્થળ પર હાજર ન હોવાથી તે હાલ ભાગી છૂટવામાં સફળ રહ્યો છે. પોલીસે દારૂ કોણે મંગાવ્યો હતો અને ક્યાં સપ્લાય કરવાનો હતો તે દિશામાં તપાસના ચક્રો ગતિમાન કર્યા છે.