સરહદનો અણમોલ ખજાનો: ભારત-પાક. બોર્ડર નજીક રાછેણા ગામના આંગણે પહોંચ્યા સેંકડો 'ફ્લેમિંગો' પક્ષી

Vav Tharad Flamingo Arrival: ગુજરાતની સરહદો માત્ર દેશની રક્ષા જ નથી કરતી, પરંતુ ક્યારેક કુદરતના એવા અદભુત નજારા પણ રજૂ કરે છે જે જોઈને આંખો ધન્ય થઈ જાય. વાવ-થરાદ સરહદને અડીને આવેલા અને ધરણિધર વિસ્તારના રાછેણા (રાસણા) ગામની અંદર આજે શનિવારે(23 મે) વહેલી સવારે એક અદભુત અને અલગ જ પ્રકારનો નજારો જોવા મળ્યો હતો. ગામના આંગણે વિદેશી મહેમાનો એટલે કે 'ગુલાબી સેના'નું આગમન થયું છે.

ભારત-પાક. બોર્ડર નજીક રાછેણા ગામના આંગણે પહોંચ્યા સેંકડો 'ફ્લેમિંગો' પક્ષી

તસવીરોમાં કેદ થયેલો આ મનોહર નજારો કોઈ વિદેશની ધરતીનો નથી, પરંતુ આપણી રાછેણા ગ્રામ પંચાયતની સરહદનો છે. સાત સમંદર પારથી આવેલા વિદેશી પક્ષીઓ 'સુરખાબ' (Flamingos) આપણા 25 કિલોમીટર લાંબા વિશાળ સફેદ રણને ખૂંદીને અહીં પધાર્યા છે.

આ પણ વાંચો: અમદાવાદીઓ માટે ખુશખબર: વેકેશનને લઈ અટલ બ્રિજ, ફ્લાવર પાર્ક અને મૂન ટ્રેલ પાર્કના સમયમાં કરાયો વધારો

ભારત-પાકિસ્તાન બોર્ડરની બિલકુલ નજીક આવેલા આ વિસ્તારમાં હજારોની સંખ્યામાં સુરખાબ પક્ષીઓ કલરવ કરતાં જોવા મળતા આખોય સરહદી વિસ્તાર ગુલાબી રંગે રંગાયો હોય તેવો ભાસ થઈ રહ્યો છે. સ્થાનિક ગ્રામજનો આ અદ્ભુત નજારાને કુદરતની બહુ મોટી બક્ષિસ સમજી રહ્યા છે અને આ નજારો સોશિયલ મીડિયા પર પણ ભારે આકર્ષણનું કેન્દ્ર બન્યો છે.