Heavy Rain in Amreli: હજુ ગુજરાતમાં સત્તાવાર રીતે ચોમાસાનું આગમન નથી થયું, પરંતુ તે પહેલાં જ અમરેલી જિલ્લામાં મેઘરાજાએ ધડબડાટી બોલાવવાનું શરૂ કરી દીધું છે. હવામાન વિભાગ દ્વારા ચોમાસાની સત્તાવાર જાહેરાત થાય તે પહેલાં જ અમરેલીમાં સતત 5મા દિવસે વરસાદનું ધમાકેદાર આગમન થયું છે.
રોડ-રસ્તાઓ પાણી-પાણી થઈ ગયા
આજે સાવરકુંડલાના ગ્રામીણ પંથકમાં મેઘરાજા ભારે મહેરબાન થયા છે. સાવરકુંડલા ગ્રામ્ય વિસ્તારના વીજપડી, ખડસલી અને છાપરી સહિતના ગામોમાં વરસાદી માહોલ જામ્યો છે. ખાસ કરીને વીજપડી ગામે વહેલી સવારથી જ ધોધમાર વરસાદ તૂટી પડતાં રોડ-રસ્તાઓ પાણી-પાણી થઈ ગયા હતા અને માર્ગો પર નદીઓ વહેતી હોય તેવા દ્રશ્યો સર્જાયા હતા.
ચોમાસાની સત્તાવાર એન્ટ્રી પહેલાં જ પડી રહેલા આ મધ્યમ અને ધોધમાર વરસાદના કારણે સમગ્ર પંથકમાં ઠંડક પ્રસરી ગઈ છે. વાવણીના સમય પહેલાં જ અમૃત સમાન વરસાદ વરસતા ધરતીપુત્રોમાં ખુશીનો માહોલ જોવા મળી રહ્યો છે અને ખેડૂતોના ચહેરા ખીલી ઉઠ્યા છે.
રાજુલા પંથકના ગ્રામ્ય વિસ્તારોમાં મેઘરાજાની ધમાકેદાર પધરામણી
બીજી તરફ રાજુલા પંથકમાં મેઘરાજાએ ધમાકેદાર એન્ટ્રી કરી છે. રાજુલા પંથકના નાની ખેરાળી, ખારી, બાબરીયાધાર અને મેરીયાણા સહિતના આસપાસના ગ્રામ્ય વિસ્તારોમાં આકાશ કાળાડિબાંગ વાદળોથી ઘેરાયું હતું અને જોતજોતામાં ધોધમાર વરસાદ તૂટી પડ્યો હતો. પવનના સુસવાટા સાથે પડેલા આ વરસાદને કારણે ગામના મુખ્ય માર્ગો અને સોસાયટીઓમાં વરસાદી પાણી ફરી વળ્યા હતા અને રસ્તાઓ પર પાણી વહેતા થયા હતા. આ પહેલા વરસાદ જ વાવણી લાયક વરસ્યો હોવાથી જગતના તાત એવા ખેડૂતોમાં હર્ષોલ્લાસનો માહોલ જોવા મળી રહ્યો છે.
અરબી સમુદ્રમાં તોફાની કરંટ
અહેવાલો અનુસાર, ગુજરાતને સ્પર્શતા અરબી સમુદ્ર અને સોમાલિયા તટની આસપાસ આગામી 5 દિવસ દરમિયાન પવનની ગતિ અતિ જોખમી સ્તરે પહોંચી શકે છે. દરિયામાં પવનની સામાન્ય ગતિ 40 થી 55 કિમી પ્રતિકલાક રહેશે, જે કેટલાક સમય માટે ઝટકા સાથે વધીને 60 થી 65 કિમી પ્રતિકલાકની ઝડપ પકડી શકે છે. આ સિસ્ટમના કારણે ગુજરાતના દરિયાકાંઠાના વિસ્તારોમાં પવનની તીવ્રતા વધશે અને સમુદ્રમાં ભારે કરંટ (ઊંચા મોજા) ઉછળશે.
માછીમારોને દરિયો ખેડવા પર પ્રતિબંધ
સમુદ્રમાં સર્જાનારી આ જોખમી સ્થિતિને ધ્યાનમાં રાખીને વહીવટી તંત્ર અને કોસ્ટ ગાર્ડ દ્વારા ગુજરાતના તમામ નાના-મોટા માછીમારોને આગામી સૂચના સુધી દરિયો ન ખેડવા માટે કડક આદેશ આપવામાં આવ્યા છે. જે માછીમારો હાલ દરિયામાં છે તેમને તાત્કાલિક સુરક્ષિત કિનારે પરત ફરી જવા અને બંદરો પર બોટ સુરક્ષિત જગ્યાએ બાંધવા તાકીદ કરાઈ છે.
ચોમાસું મહારાષ્ટ્ર તરફ આગળ વધ્યું, ગુજરાતમાં હજુ રાહ જોવી પડશે
હવામાન નિષ્ણાતોના વિશ્લેષણ અનુસાર, ચોમાસું હાલ ધીમે-ધીમે તેની ગતિ પકડી રહ્યું છે. આગામી 48 કલાકમાં ચોમાસું મહારાષ્ટ્રના વધુ વિસ્તારોને આવરી લે તેવી સાનુકૂળ પરિસ્થિતિ છે. જોકે, ગુજરાતના બાકીના ભાગોમાં ચોમાસાના સાર્વત્રિક અને વ્યાપક પ્રવેશ માટે હજુ પણ રાજ્યના નાગરિકોએ થોડી રાહ જોવી પડશે.
