Amreli News : અમરેલીના ધારીના ગોપાલગ્રામ સીમ વિસ્તારમાં બાળક પર આજે (21 ડિસેમ્બર) વહેલી સવારે દીપડાએ હુમલો કર્યો હતો. જેમાં દીપડાએ તુવરના પાકમાં 5 વર્ષના બાળકને લઈ જઈને ફાડી ખાધુ હતું. સમગ્ર ઘટના અંગે સ્થાનિકોએ જાણ કરતાં વન વિભાગની ટીમ ઘટનાસ્થળે પહોંચી હતી અને દીપડાને પકડી પાડવા પાંજરુ ગોઠવવામાં આવ્યું હતું. અંતે દીપડો પાંજરે પૂરાયો છે.
ધારીમાં માનવભક્ષી દીપડો પાંજરે પૂરાયો
મળતી માહિતી મુજબ, અમરેલીના ધારીમાં ગોપાલગ્રામ નજીક એક વાડીમાં દીપડાએ સાહિલ રાકેશભાઈ કટારા (ઉં.વ.5) નામના બાળક પર હુમલો કર્યો હતો. સમગ્ર ઘટનાને લઈને પરિવારજન સહિતનો લોકોએ બુમાબુમ કરતાં દીપડો ત્યાંથી ભાગી ગયો હતો. ઘટનામાં ગંભીર રીતે ઈજાગ્રસ્ત બાળકને સારવાર માટે હોસ્પિટલ ખસેડવામાં આવ્યો હતો. જ્યાં ડૉક્ટરે બાળકને મૃત જાહેર કર્યો હતો.
બાળક પર હુમલાની ઘટના બાદ વન વિભાગની ટીમ ઘટનાસ્થળે પહોંચી હતી અને દીપડાને ઝડપી પાડવા માટે અલગ-અલગ જગ્યાએ ત્રણ જેટલાં પાંજરા ગોઠવ્યા હતા.
વન વિભાગના કર્મચારીઓ દ્વારા દીપડાને પાંજરે પુરવાની કવાયત હાથ ધરી હતી. વન વિભાગની ટીમ દ્વારા મૂકેલા પાંજરામાં ગણતરીની કલાકોમાં દીપડો પૂરાયો હતો. હુમલાખોર દીપડાને એનિમલ કેર સેન્ટર ખાતે લઈ જવાની વન વિભાગે કવાયત હાથ ધરી છે. બીજી તરફ, દીપડો પાંજરે પૂરાતા સ્થાનિકોએ રાહતના શ્વાસ લીધા છે.
