વલસાડમાં નકલી ડેપ્યુટી મામલતદાર યુવતી ઝડપાઈ, નોકરીની લાલચ આપી ચાર યુવકો પાસેથી રૂ.9.59 લાખ પડાવ્યા

Valsad News : ગુજરાતમાં નકલી પોલીસ, જજ, કોર્ટ સહિતની ભરમાર વચ્ચે વલસાડમાં નકલી ડેપ્યુટી મામલતદાર યુવતી ઝડપાઈ છે. યુવતીએ નકલી આઈ-કાર્ડ રાખીને નોકરી આપવાના બહાને ચાર યુવકો સાથે છેતરપિંડી કરી હતી અને તેમની પાસેથી કુલ 9.59 લાખ રૂપિયા પડાવી પાડ્યા હતા. સમગ્ર મામલે પોલીસે 23 વર્ષીય નકલી ડેપ્યુટી મામલતદારની ધરપકડ કરીને આગળની કાર્યવાહી હાથ ધરી છે.

વલસાડમાં નકલી ડેપ્યુટી મામલતદાર યુવતી ઝડપાઈ 

વલસાડ જિલ્લામાં નકલી ડેપ્યુટી મામલતદાર યુવતી ઝડપાઈ છે. આરોપી નિમિષા નાયકા પોતાને ડેપ્યુટી મામલતદાર જણાવીને નોકરી અપાવવાની લાલચે ચાર યુવકો સાથે છેતરપિંડી કરી હોવાનું સામે આવ્યું છે. નિમિષા મૂળ અમબાચ ગામની છે અને હાલમાં તાપી જિલ્લાના સોનગઢ તાલુકાના ગતાડી ગામમાં રહે છે. નિમિષા વોટ્સએપના માધ્યમથી લોકોનો સંપર્ક કરીને નોકરીની લાલચ આપતી હતી. 

યુવકોને નોકરીની લાલચ આપીને રૂ.9.59 લાખ પડાવ્યાં

મળતી માહિતી મુજબ, નકલી ડેપ્યુટી મામલતદાર યુવતીએ ઉદવાડાના માનવ પટેલને કલેક્ટર ઓફિસમાં PA તરીકેની નોકરીની લાલચ આપી 4.75 લાખ રૂપિયા પડાવ્યા હતા. કપરાડાના વાજવડના ગુંજેશ પટેલ પાસેથી ડ્રાઈવરની નોકરીના બહાને રૂ.39 હજાર લઈ લીધા હતા. જ્યારે યુવતીએ બીલીમોરાના રાહુલ પંચોલી પાસેથી રૂ. 4.13 લાખ અને પારડીના સામરપાડાના મિલન પટેલ પાસેથી 31800 રૂપિયા પડાવ્યા હતા.

આ પણ વાંચો: અમદાવાદમાં 52.5 લાખના MD ડ્રગ્સ સાથે એક મહિલા સહિત બેની ધરપકડ, ક્રાઈમ બ્રાન્ચની કાર્યવાહી

સમગ્ર ઘટના મામલે યુવકોને નોકરી ન મળતા પોતાની સાથે છેતરપિંડી થઈ હોવાનું જણાય આવ્યું હતું. આ પછી યુવકોએ આ મામલે પારડી પોલીસનો સંપર્ક કર્યો હતો. લાખોની છેતરપિંડી મામલે પોલીસે ધો.12 પાસ ભેજાબાજ યુવતીની ધપરકડ કરીને આગળની કાર્યવાહી હાથ ધરી છે.