આણંદ સાઇબર ક્રાઇમ દ્વારા તપાસ હાથ ધરાઈ
કવરમાં ફોટો મોકલીને ફોન મારફતે ખંડણી માગીને બદનામ કરવાનું કૃત્ય કરનાર સાયબર ગઠિયા સામે પોલીસ ફરિયાદ
ખંભાતની એક જાણીતી શૈક્ષણિક સંસ્થાના ટ્રસ્ટીને ગત તારીખ ૨૮મી ઓક્ટોબરના રોજ રાત્રિના સુમારે તેમના મોટાભાઈએ વોટ્સએપ મારફતે અખબાર કટિંગના ફોટા મોકલાવ્યા હતા. જેમાં તેમના પરિવારજનો અને મિત્રના ફોટા હતા. આ કટિંગમાં પરિવારના સભ્યો અને મિત્રના ફોટા મૂકી બદનામ કરવા માટે ટિપ્પણી કરાઈ હતી. જે બાબતે તપાસ કરતા ખંભાતના એક વોટ્સએપ ગુ્રપથી આ ન્યૂઝ પેપર કટિંગનો ફોટો મળ્યો હોવાનો જાણવા મળ્યું હતું. બાદમાં તારીખ ૩૧ ઓક્ટોબરના રોજ તેઓને પોસ્ટમાં બે કવર મળ્યા હતા. આ કવરમાં જોતા અંદરથી એડીટીંગ અને મોર્ફ કરેલા પરિવારના સભ્યના બિભસ્ત ફોટા મળ્યા હતા. તપાસ કરતા અન્ય સગા સંબંધીઓને પણ આવા કવર મોકલ્યા હોવાનું જાણવા મળ્યું હતું. ગત તારીખ ૧૮મી નવેમ્બરના રોજ બીજા બે કવર પોસ્ટ મારફતે તેમને મળ્યા હતા. જેમાં વધુ ૮ જેટલા બિભત્સ ફોટા મોકલવામાં આવ્યા હતા.
તારીખ ૩૧મી ઓક્ટોબરના રોજ બપોરના સુમારે મનીષ મકવાણા નામના એક શખ્સે ટ્રસ્ટીને વોટ્સએપ કોલ કર્યો હતો અને જણાવ્યું હતું કે, ઘરે એક કવર આવેલું છે. જેમાં તમારા પરિવારના સભ્યના બિભસ્ત ફોટાઓ છે. આ ફોટાઓના બદલામાં રૂપિયા એક લાખ આપો નહીં તો ફોટા વાયરલ કરીશ, તેવી ધમકી આપી હતી. જેથી ટ્રસ્ટીએ મનીષ મકવાણાને ખોટી વાત ન કરવાનું કહી ફોન કટ કરી દીધો હતો. ત્યારબાદ ફરીથી ટ્રસ્ટીના મિત્ર ઉપર મનીષ મકવાણાએ વોટ્સઅપ કોલ કરી બિભસ્ત ફોટા વાયરલ કરવાની ધમકી આપી રૂપિયા બે લાખ આંગડિયા થકી મોકલી આપવા કહ્યું હતું. આ મામલે ફરિયાદ નોંધાતા ટ્રસ્ટીએ આણંદ સાયબર પોલીસ સ્ટેશનમાં ફરિયાદ નોંધાવતા પોલીસે મનીષ મકવાણા નામના શખ્સ સહિત તેની સાથેના અજાણ્યા શખ્સો સામે ગુનો નોંધી વધુ તપાસ હાથ ધરી હતી.
