એક શિક્ષકનું અનોખું સમર્પણ: ધોલેરાના મીનેશભાઈ વાળંદને શ્રેષ્ઠ શિક્ષક એવોર્ડ, અનેક દીકરીઓના જીવનમાં લાવ્યા પરિવર્તન

Teacher Day Special : શિક્ષક દિવસ નિમિત્તે અમદાવાદના ધોલેરા તાલુકાની વાલીન્ડા પ્રાથમિક શાળાના શિક્ષક મીનેશભાઈ નાનાભાઈ વાળંદને રાજ્યના શ્રેષ્ઠ શિક્ષક એવોર્ડથી સન્માનિત કરવામાં આવ્યા છે. ગુજરાતના રાજ્યપાલ અને મુખ્યમંત્રીના હસ્તે અમદાવાદના ટાગોર હોલ ખાતે તેમને આ ગૌરવપૂર્ણ એવોર્ડ એનાયત કરવામાં આવ્યો હતો. છેલ્લા 19 વર્ષથી એક જ શાળામાં સેવા આપતા મીનેશભાઈએ શિક્ષણ અને સમાજસેવાના અનોખા સમન્વયથી એક નવી ઓળખ ઊભી કરી છે.

વિદ્યાર્થીઓના સર્વાંગી વિકાસ માટે અનોખા પ્રયાસો

મીનેશભાઈ માત્ર પાઠ્યપુસ્તકના જ્ઞાન પૂરતા સીમિત રહ્યા નથી, પરંતુ વિદ્યાર્થીઓના સર્વાંગી વિકાસ પર ધ્યાન કેન્દ્રિત કર્યું છે.

નવીનતા અને સર્જનાત્મકતા: તેમણે ‘પેટર્ન ઓફ વાલીન્ડા’ નામનું ઇનોવેશન રજૂ કર્યું છે, જેનાથી બાળકોની નિયમિત હાજરી અને શિક્ષણ પ્રત્યેનો રસ જળવાઈ રહે છે. આ ઉપરાંત, તેઓ વિદ્યાર્થીઓને IIM અને સૃષ્ટિ દ્વારા આયોજિત ચિલ્ડ્રન ક્રિએટિવિટી વર્કશોપમાં ભાગ લેવડાવે છે. તેમના આ પ્રયાસથી એક વિદ્યાર્થીનું રાષ્ટ્રપતિ દ્વારા સન્માન પણ થયું છે.

રમત-ગમતમાં સિદ્ધિ: તેમના માર્ગદર્શન હેઠળ, એક વિદ્યાર્થીની બંસી કિરીટભાઈ મેર કુસ્તી અને બેડમિન્ટનમાં રાજ્યકક્ષાએ પ્રથમ આવી છે અને તાજેતરમાં મુંબઈમાં પણ પ્રથમ સ્થાન મેળવી ગુજરાતનું નામ રોશન કર્યું છે.

આ પણ વાંચો: ગુજરાતમાં આગામી 2 દિવસ અતિભારે વરસાદની આગાહી, 5 જિલ્લામાં રેડ એલર્ટ

પરીક્ષામાં સફળતા: તેઓ ધોરણ 8ના વિદ્યાર્થીઓને CET, NMMS, જ્ઞાનસાધના અને PSE જેવી સ્પર્ધાત્મક પરીક્ષાઓની તૈયારી કરાવે છે, જેનાથી અનેક વિદ્યાર્થીઓ મેરિટમાં આવી શિષ્યવૃત્તિ અને રેસિડેન્શિયલ સ્કૂલમાં પ્રવેશ મેળવી રહ્યા છે.

દીકરીઓના શિક્ષણ માટે સમર્પણ

જે વિસ્તારોમાં દીકરીઓના શિક્ષણનું પ્રમાણ ઓછું છે, ત્યાં મીનેશભાઈએ ધોરણ 8 પાસ કરેલી 50થી વધુ દીકરીઓને ગાંધીનગરની આદર્શ નિવાસી શાળામાં પ્રવેશ અપાવીને તેમનું શિક્ષણ ચાલુ રખાવ્યું છે. આ દીકરીઓમાંથી ઘણી આજે ગ્રેજ્યુએટ, પોસ્ટ ગ્રેજ્યુએટ, બી.એડ., એલ.એલ.બી. સુધીનો અભ્યાસ પૂર્ણ કરી ચૂકી છે, અને કેટલીક તો શિક્ષક તરીકે સેવા પણ આપી રહી છે.

અનેક સન્માનોના હકદાર

શિક્ષણ ક્ષેત્રે તેમના અસાધારણ યોગદાન બદલ, મીનેશભાઈને અગાઉ 'ગુજરાત ગૌરવ એવોર્ડ', 'શ્રેષ્ઠ ભાષા શિક્ષક એવોર્ડ' અને 'શ્રેષ્ઠ આચાર્ય સન્માન' જેવા અનેક પુરસ્કારો પ્રાપ્ત થયા છે. ઉપરાંત, તેઓ ધોરણ 1 થી 8ના ગુજરાતી પાઠ્યપુસ્તકોના લેખક અને સમીક્ષક તરીકે પણ સેવા આપી ચૂક્યા છે.

આ પણ વાંચો: શિક્ષક દિને શિક્ષકોનું આંદોલન: ખાલી બેઠકો ભરવા સહિતની માગ સાથે ગાંધીનગર સત્યાગ્રહ છાવણી ખાતે વિરોધ પ્રદર્શન

મીનેશભાઈના આ કાર્યને કારણે ગામના સરપંચ અને વાલીઓ પણ હર્ષ અને ગર્વની લાગણી અનુભવી રહ્યા છે. તેમનું આ સન્માન શિક્ષણ અને સામાજિક જવાબદારીનું એક ઉત્તમ ઉદાહરણ પૂરું પાડે છે.