ગુજરાતમાં CWG-2030 ની તૈયારીઓ શરૂ, કોમનવેલ્થ સ્પોર્ટ ટીમ વડોદરાની મુલાકાતે

CWG-2030 : ગુજરાતમાં વર્ષ 2030માં યોજાનારી કોમનવેલ્થ ગેમ્સ (CWG-2030)ની પૂર્વતૈયારીઓએ વેગ પકડ્યો છે. આ ભવ્ય રમતોત્સવના આયોજનના નિરીક્ષણ અને અભ્યાસ માટે કોમનવેલ્થ સ્પોર્ટ ટીમની પ્રથમ ડેલીગેશન ગુજરાતની મુલાકાતે આવી પહોંચી છે. આ પ્રવાસ દરમિયાન ટીમ વડોદરાના વિવિધ રમતગમતના સ્થળોની પણ મુલાકાત લેશે.

કોમનવેલ્થ સ્પોર્ટના પ્રેસિડેન્ટ ડોનાલ્ડ રૂકરેની અધ્યક્ષતામાં પાંચ સભ્યોની ટીમ અને ઇન્ડિયન ઓલમ્પિક્સ એસોસિએશનના પદાધિકારીઓ 8 એપ્રિલથી 11 એપ્રિલ દરમિયાન ગુજરાતમાં રોકાણ કરવાના છે. ટીમ દ્વારા વડોદરા ક્રિકેટ સ્ટેડિયમ સહિતના મહત્વના સ્પોર્ટ્સ ઇન્ફ્રાસ્ટ્રક્ચરની મુલાકાત લેવામાં આવશે. 

રાજ્યના મુખ્યમંત્રી ભૂપેન્દ્ર પટેલે કોમનવેલ્થ સ્પોર્ટ ડેલીગેશનને ખાતરી આપી છે કે ગુજરાત સરકાર વર્ષ 2030ની ગેમ્સના સફળ સંચાલન માટે વડોદરા સહિત તમામ સ્થળોએ જરૂરી વર્લ્ડ ક્લાસ ઇન્ફ્રાસ્ટ્રક્ચર અને સુવિધાઓ ઝડપથી પૂરી પાડશે.

 અમદાવાદ ખાતે વીર સાવરકર કોમ્પ્લેક્સ, નરેન્દ્ર મોદી સ્ટેડિયમ અને એકા એરેના, ગાંધીનગર ખાતે સ્પોર્ટ્સ કોમ્પ્લેક્સ અને અન્ય સુવિધાઓ, એકતા નગર (કેવડિયા) ખાતે સ્ટેચ્યુ ઓફ યુનિટી ખાતેની તૈયારીઓનું નિરીક્ષણ કરશે.