અમૂલ ડેરીની ચૂંટણીમાં ચાર બેઠકો બિનહરીફ 9 બેઠકો માટે 22 ઉમેદવારો વચ્ચે જંગ જામશે

ચૂંટણીમાં 16 ઉમેદવારીપત્ર પરત ખેંચાયા 

સાત બેઠકમાં ભાજપ અને અપક્ષ વચ્ચે રસાકસી થશે

બાલાસિનોર, ઠાસરા, મહેમદાવાદ અને વીરપુર બેઠક બિનહરીફ આણંદ બેઠક પર પાંચ અને માતર બેઠકમાં ત્રણ ઉમેદવારો 

અમૂલ ડેરીની નિયામક મંડળની સામાન્ય ચૂંટણીની પ્રક્રિયા ૨૮ ઓગસ્ટથી શરૂ થઇ હતી. ૨૯ ઓગસ્ટે ઉમેદવારી પત્રની ચકાસણી થઇ હતી.જેમાં ૧૩ ઉમેદવારી પત્ર રદ થયા હતા અને ૪૨ ઉમેદવારો માન્ય રહ્યાં હતા. આજે ઉમેદવારી પત્ર પરત ખેંચવાનો છેલ્લો દિવસે ૧૬ ઉમેદવારી પત્ર પરત ખેંચાયા હતા. જેમાં 26 ઉમેદવારી પત્ર માન્ય રહ્યાં હતા અને બેઠકો બિનહરીફ કરવા માટે ભાજપ સામ, દામ, દંડ અને ભેદની નીતિ અજમાવી હતી. 

જેથી બાલાસિનોર, ઠાસરા, મહેમદાવાદ અને વીરપુર બેઠક બિનહરીફ થઇ હતી. હવે અમૂલ ડેરીમાં નવ બેઠકો માટે ૨૨ ઉમેદવારો વચ્ચે ચૂંટણી જંગ તા. ૧૦મી સપ્ટેમ્બરે ખેલાશે. આણંદ બેઠકમાં પાંચ, માતર બેઠકમાં ત્રણ ઉમેદવારો વચ્ચે ટક્કર થશે. જયારે સાત બેઠકમાં ભાજપ અને અપક્ષ વચ્ચે સીધો જંગ જામશે. તા. ૧૦મી સપ્ટેમ્બરે બેલેટ પેપરથી ચૂંટણી યોજાશે અને ઉમેદવારોને નિશાન ફાળવણી સહિતની  પ્રક્રિયા હાથ ધરાઇ છે.  

આણંદ બેઠક પર કાંતિભાઇ સોઢા પરમાર માટે પ્રતિષ્ઠાનો પ્રશ્ન બનશે

કોંગ્રેસ છોડીને ભાજપમાં આવીને અમૂલના વાઇસ ચેરમેન બનેલા કાંતિભાઈ સોઢા પરમાર માટે આણંદ બેઠક પ્રતિષ્ઠાનો પ્રશ્ન બની છે. હાલ આ બેઠકમાં ચાર સક્ષમ ઉમેદવારો ચૂંટણી જંગમાં હોવાથી ૧૦૭ મતદારો ધરાવતી આણંદ બેઠકમાં ભારે ઉત્તેજના સર્જાશે. કાંતિભાઈ આ બેઠક નહીં જીતે તો તેમના રાજકીય ભવિષ્ય ઉપર પ્રશ્ન ઉઠી શકે તેમ છે.

પેટલાદ બેઠક બિનહરીફ કરાવવા માટે છેલ્લી ઘડી સુધીના પ્રયાસો

ભાજપ માટે પ્રતિાની બેઠક ગણાતી પેટલાદ બેઠકમાં હાલ કેડીસીસીના ચેરમેન તેજસ પટેલ ના પત્ની બીનાબેન પટેલ ઉમેદવારી કરી રહ્યા છે. ત્યારે આ બેઠક બિનહરીફ થાય તે માટે પ્રયાસો કરવામાં આવ્યા હતા અને બિનહરીફ  થવાની ઉજળી તકો પણ બપોર સુધીમાં સાંભળવા મળી હતી પરંતુ છેલ્લે આશા ઉપર પાણી ફરી વળતો હવે ચૂંટણી જંગ જામશે.