ગૂગલ મેપ પર લોકેશન શોધી 18 મંદિરોમાં કર્યો ‘હાથફેરો’, અમરેલીમાં મધ્યપ્રદેશના 6 ચોરની ધરપકડ

Amreli News: અમરેલી જિલ્લામાં છેલ્લા કેટલાક સમયથી મંદિરોને નિશાન બનાવતી ‘મંદિર ચોર’ ગેંગનો અમરેલી એલ.સી.બી.(લોકલ ક્રાઈમ બ્રાન્ચ)એ પર્દાફાશ કર્યો છે. નવાઈની વાત એ છે કે, આ તસ્કરો ચોરી કરવા માટે ગૂગલ મેપની આધુનિક ટેકનોલોજીનો ઉપયોગ કરતા હતા. પોલીસે મધ્યપ્રદેશના વતની અને હાલ ખેત મજૂરી કરતા 6 શખ્સોની ધરપકડ કરી, તેમની પાસેથી રોકડ અને વાહનો મળી કુલ 2,25,695 રૂપિયાનો મુદ્દામાલ કબજે કર્યો છે. આ ટોળકી પકડાતા 18 જેટલા વણઉકેલાયેલા ગુનાઓનો ભેદ ઉકેલાયો છે.

કેવી રીતે ચોરીને આપતા અંજામ?

પોલીસ તપાસમાં આરોપીઓએ ચોંકાવનારી કબૂલાત કરી હતી કે, તેઓ ગૂગલ મેપમાં ગામ બહાર આવેલા એકાંત મંદિરોના લોકેશન સર્ચ કરતા હતા. ત્યારબાદ આ લોકેશન એકબીજાને શેર કરી, ત્યાંની રેકી કરતા હતા. રાત્રિના સમયે બાઈક પર ભેગા થઈ, મંદિરોમાં પ્રવેશ કરી ચાંદીના છત્તર, મૂર્તિના આભૂષણો અને દાનપેટી તોડી ચોરીને અંજામ આપી ફરાર થઈ જતા હતા.

મધ્યપ્રદેશના વતની, સૌરાષ્ટ્રમાં ખેત મજૂરી

પોલીસે બાતમી અને ટેકનિકલ સર્વેલન્સના આધારે 6 શખ્સોને ઝડપી પાડ્યા છે, જેઓ મૂળ મધ્યપ્રદેશના અલીરાજપુર જિલ્લાના વતની છે અને હાલ સૌરાષ્ટ્રમાં અલગ-અલગ જગ્યાએ ખેત મજૂરી કરે છે

1: મલેશ ઉર્ફે કમીશ ચંદરસીંગ બામનીયા (ઉ.વ.22) 

2: ગોપાલ ઉર્ફે ગુડીયો સરદાસભાઇ બામનીયા (ઉ.વ.21) 

3: નરપતસિંહ સુભાન ગાવડ (ઉ.વ.32) 

4: બાયસીંગ પારૂભાઇ અજનાર (ઉ.વ.28)

5: સીરદાર ઉર્ફે સરદાર કેલસીંગ મહેડા (ઉ.વ.30) 

6: સુરેશભાઇ કાળીયાભાઇ બામનીયા (ઉ.વ.20)

આ પણ વાંચો: કીર્તિ પટેલનો નવો વિવાદ! ભગવા વસ્ત્રો પહેરી મૃગીકુંડમાં સ્નાન કર્યું, સાધુ-સંતોમાં નારાજગી

કયા કયા મંદિરોને બનાવ્યા હતા ટાર્ગેટ?

આ ટોળકીએ અમરેલી, જિલ્લામાં હાહાકાર મચાવ્યો હતો. પૂછપરછમાં  18 સ્થળોએ ચોરી કર્યાની કબૂલાત આપી છે, જેમાં લાઠી તાલુકા: માલવીયા પીપરીયાનું ગેલ માતાજી મંદિર, અડતાળાનું હનુમાનજી મંદિર, લીલીયાના અંટાળેશ્વર મહાદેવ, પ્રેમસાહેબ આશ્રમ અને અન્ય મઢો વડીયાના બાંભણીયા અને લુણીધારના માતાજીના મંદિરો, દામનગર રામાપીરનું મંદિર, જસદણ તાલુકાના સતાપર, સાણથલી, કુંભાજીની દેરડીના મંદિરો, બાબરા મોટા દેવળીયા, મોટા આંકડીયા અને થોરખાણના મંદિરોમાં ચોરી કરી હોવાનું જણાવ્યું હતું. પોલીસે આરોપીઓ પાસેથી રોકડા રૂ. 70,695, ચોરીમાં વપરાયેલા બે મોટરસાયકલ મળીને કુલ 2,25,695 રૂપિયાનો મુદ્દામાલ જપ્ત કર્યો છે.