Ahmedabad Theft: અમદાવાદમાં તસ્કરોનો આતંક યથાવત્ જોવા મળી રહ્યો છે. શહેરના પોશ ગણાતા ઈનકમટેક્સ વિસ્તારમાં ચોરીની એક અનોખી ઘટના સામે આવી છે, જેમાં ઘરના સભ્યો નીચેના માળે હાજર હોવા છતાં તસ્કરો ઉપરના માળેથી લાખોની મતા ચોરી કરી રફુચક્કર થઈ ગયા હતા. તસ્કરોએ એક મકાનને નિશાન બનાવી કુલ 2,30,792 રૂપિયાની મતાની ચોરી કરી છે.
દંપતી ટીવી જોવામાં મગ્ન હતું ને તસ્કર સીડીએથી ચઢ્યો
આ ઘટના અંગે કમ્પ્યુટર સેલ્સ એન્ડ સર્વિસનો વ્યવસાય કરતા 37 વર્ષીય મયંકભાઈ શાહે પોલીસમાં ફરિયાદ નોંધાવી છે. 30મી એપ્રિલના રોજ રાત્રે મયંકભાઈ અને તેમના પત્ની બે માળના મકાનમાં નીચેના રૂમમાં બેસીને ટીવી જોઈ રહ્યા હતા. આ દરમિયાન તસ્કરો મકાનના પાછળના દરવાજાનો નકૂચો તોડી સીડી દ્વારા ઉપરના માળે પહોંચ્યા હતા, જે રૂમનો ઉપયોગ વધારાનો સામાન રાખવા માટે થતો હતો.
તિજોરી સાફ કરી, એસીની પાઇપ પણ ન છોડી
ઉપરના રૂમમાંથી અચાનક અવાજ આવતા મયંકભાઈ અને તેમના પત્ની તપાસ કરવા દોડી ગયા હતા. ત્યાં પહોંચતા જ જોયું તો લોખંડની તિજોરી ખુલ્લી હતી અને સામાન વેરવિખેર હતો. ચોર તિજોરીમાંથી જૂની નોટોનું કલેક્શન, સોનાનું લેડીઝ બ્રેસલેટ અને બે મોંઘી ઘડિયાળો, પીતળના વાસણો અને એસીની કોપર પાઇપ, કોમ્પ્યુટર અને કેમેરાના વાયરો ચોરી ગયા હતા.
ભોગ બનનાર પરિવારે આ સમગ્ર મામલે અજાણ્યા શખસો સામે પોલીસ ફરિયાદ નોંધાવી છે. ફરિયાદીના જણાવ્યા મુજબ, ચોર પાછળના દરવાજાનો નકૂચો તોડી સીડી દ્વારા ઉપરના રૂમમાં પ્રવેશ્યો હતો. પોલીસે આ મામલે ગુનો નોંધી તસ્કરોને ઝડપી પાડવા માટે તપાસના ચક્રો ગતિમાન કર્યા છે.
