સુરતના ઉદ્યોગપતિની ધરપકડ, છેતરપિંડીના કેસમાં થઈ કાર્યવાહી, જુઓ કેવી રીતે વેપારીને 8.5 કરોડનો ચૂનો લગાવ્યો

Ahmedabad News : અમદાવાદ શહેર ઇકોનોમિક ઓફેન્સિસ વિંગ (EOW)એ 8.5 કરોડ રૂપિયાના ફાર્માસ્યુટિકલ કાચા માલના છેતરપિંડી મામલે સુરતના એક ઉદ્યોગપતિની ધરપકડ કરી છે. આરોપીએ કરોડોના ફાર્માસ્યુટિકલ કાચા માલના વેપારી ભાગીદાર સાથે વારંવાર ચૂકવણીમાં ડિફોલ્ટ કરીને અને કન્સાઇનમેન્ટ માટે જારી કરાયેલા ચેક રોકીને છેતરપિંડી કરી હતી.

ACPએ શું જણાવ્યું?

ઇકોનોમિક ઓફેન્સિસ વિંગના ACPના જણાવ્યા અનુસાર, સુરતમાં વિકાસ શર્મા નામનો આરોપી છેલ્લા બેથી ત્રણ વર્ષથી ફરિયાદી સાગર દેસાઈ સાથે ફાર્માસ્યુટિકલ કાચા માલનો વેપાર કરતો હતો. શર્મા એક ફાર્માસ્યુટિકલ કંપનીના માલિક તરીકે ઓળખાતો હતો અને નિયમિતપણે જથ્થાબંધ કાચા માલના ઓર્ડર આપતો હતો. શરૂઆતમાં આરોપી ફરિયાદીનો વિશ્વાસ મેળવવા માટે સમયસર ચૂકવણી કરતો હતો.

પોલીસે જણાવ્યું હતું કે, આ પછી લગભગ રૂ.8.5 કરોડના માલનો ઓર્ડર આપ્યા પછી શર્માએ ચેક આપવાનું શરૂ કર્યું, જે તેણે બેંકમાં રોકી દીધા હતા. સમગ્ર મામલે ફરિયાદીએ અનેક વખત રજૂઆત કર્યા છતાં આરોપી બાકી રકમ ચૂકવતો ન હતો.

સમગ્ર મામલે સાગર દેસાઈ નામના પીડિતે EOWમાં ફરિયાદ નોંધાવી હતી. આ પછી પોલીસને જાણવા મળ્યું હતું કે, શર્મા પર પહેલાથી જ અનેક ગુનાહિત કેસ નોંધાયેલા છે: ચાર તેમની સામે મહારાષ્ટ્રમાં અને એક અમદાવાદ EOW માં નોંધાયેલ છે. તેમનો અગાઉના ગુનાઓનો ઇતિહાસ પણ છે અને EOW અધિકારીઓએ આ કેસમાં ધરપકડ કરી ત્યારે તેઓ સેન્ટ્રલ જેલમાં ન્યાયિક કસ્ટડીમાં હતા.

આ પણ વાંચો: સિરિયલ કિલર વિપુલની માતાએ કંટાળીને કહ્યું હતું કે જે કરવું હોય કરો, પીડિત વૈભવની માતાએ કહ્યું- ન્યાય થયો

પોલીસે જણાવ્યું હતું કે, કેસ મામલે પોલીસે આરોપી શર્માની ધરપકડ કરી હતી અને રિમાન્ડ માટે સ્થાનિક કોર્ટમાં રજૂ કરવામાં આવશે. જ્યારે ગેરરીતિમાં સામેલ ભંડોળને શોધવા અને છેતરપિંડીમાં કોણ-કોણ સામેલ છે તેને લઈને પોલીસે વધુ તપાસ હાથ ધરી છે.