અમદાવાદ એરપોર્ટ પર કસ્ટમ્સની મોટી કાર્યવાહી, વિદેશી સિગારેટના જથ્થા સાથે બે શખસો ઝડપાયા

Ahmedabad Airport Foreign Cigarettes Seized: અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર કસ્ટમ્સ વિભાગે ગેરકાયદે રીતે લાવવામાં આવતા વિદેશી સિગારેટના મોટા જથ્થાનો પર્દાફાશ કર્યો છે. એરપોર્ટ પર સઘન ચેકિંગ દરમિયાન બે શંકાસ્પદ પેસેન્જરો પાસેથી 16,600 નંગ વિદેશી સિગારેટ જપ્ત કરવામાં આવી છે. કસ્ટમ્સ વિભાગે પ્રતિબંધિત માલ જપ્ત કરી બંને મુસાફરોની અટકાયત કરીને આગળની કાયદેસરની કાર્યવાહી હાથ ધરી છે.

ચેકિંગ દરમિયાન ઝડપાયો શંકાસ્પદ સામાન

મળતી માહિતી અનુસાર, અમદાવાદ એરપોર્ટના ઈન્ટરનેશનલ ટર્મિનલ પર કસ્ટમ્સના અધિકારીઓ નિયમિત ચેકિંગમાં હતા. આ દરમિયાન બે મુસાફરોની ગતિવિધિ શંકાસ્પદ જણાતા તેમને અટકાવવામાં આવ્યા હતા. તેમના સામાનનું સ્કેનિંગ અને તપાસ કરવામાં આવતા, અંદર છુપાવીને રાખવામાં આવેલા વિદેશી સિગારેટના પેકેટો મળી આવ્યા હતા. કસ્ટમ્સ વિભાગે ગણતરી કરતા કુલ 16,600 નંગ સિગારેટ હોવાનું સામે આવ્યું હતું, જેની બજાર કિંમત લાખો રૂપિયા આંકવામાં આવી રહી છે.

આ પણ વાંચો: દેવભૂમિ દ્વારકા: ગોમતીઘાટમાં સ્નાન કરતી વખતે રાજકોટના બે સગા ભાઈઓ ડૂબ્યા, એકનો બચાવ, બીજો લાપતા

પકડાયેલા મુસાફરો કેરલમના રહેવાસી

કસ્ટમ્સની પ્રાથમિક પૂછપરછ અને દસ્તાવેજોની તપાસમાં પકડાયેલા બંને આરોપીઓની ઓળખ સામે આવી છે. પકડાયેલા બંને શખસો મૂળ કેરલમના મલાપ્પુરમ અને કોઝિકોડ વિસ્તારના રહેવાસી છે. ભારતમાં વિદેશી સિગારેટ પર વસૂલવામાં આવતી મજબૂત કસ્ટમ્સ ડ્યુટી (ટેક્સ) ચોરી કરીને નફો કમાવવા માટે આ જથ્થો ગેરકાયદે રીતે ઘુસાડવામાં આવી રહ્યો હોવાની આશંકા છે.

હાલમાં આ સિગારેટનો જથ્થો જપ્ત કરી લીધો છે અને આ બંને યાત્રીઓ સિગારેટનો મોટો જથ્થો ક્યાંથી લાવ્યા હતા અને કોને સપ્લાય કરવાના હતા તે અંગે વધુ તપાસ હાથ ધરી છે.