Jamnagar : જામનગર જિલ્લાના લાલપુર તાલુકાના એક ગામમાં રહેતી સગીરાને તેના ઘરની સીડી પાસે રોકી લઈ બે વર્ષ પહેલાં એક શખ્સે અણછાજતા અડપલા કર્યા હતા તેની પોલીસમાં ફરિયાદ કરાતા પોક્સો એક્ટ હેઠળ ગુન્હો નોંધાયો હતો. તે કેસ ચાલી જતા અદાલતે આરોપીને પાંચ વર્ષની સખત કેદની સજા ફટકારી છે. અને ભોગ બનનારને રૂપિયા બે લાખનું વળતર ચૂકવવા પણ અદાલતે આદેશ કર્યો છે.
લાલપુર પંથકમાં રહેતા એક પરિવારની સાડા અગિયાર વર્ષની પુત્રી ગઈ તા.19-7-24 ના દિવસે શાળાએથી બપોરના સમયે છૂટ્યા પછી બેએક વાગ્યે સાયકલ પર ઘર તરફ જવા માટે નીકળ્યા પછી ઘર પાસે પહોંચી ત્યારે જામનગર-ખંભાળિયા ધોરીમાર્ગ પર આવેલા મોટી ખાવડી ગામ નજીકના ગાગવાધાર ગામમાં રહેતા દિનેશ રામભાઈ વાઘોરા (ઉ.વ.25) નામના શખ્સે તેણી પર નજર બગાડી હતી.
ત્યાં એક ઘર પાસે હાઉસકીપરનું કામ કરતા દિનેશે સીડી ચઢી રહેલી તરૂણીની પાછળ જઈ તેણી સાથે અણછાજતા અડપલા કરી હાથ પકડી લીધો હતો. ડરી ગયેલી તરૂણી દોડીને પોતાના ઘરમાં ચાલી ગઈ હતી અને તેણીએ માતાને વાત કરતા પોલીસમાં ફરિયાદ કરવામાં આવી હતી.આથી પોલીસે આરોપી સામે ગુનો નોંધીને તેની ધરપકડ કરી હતી.
અંગેનો કેસ પોક્સો કોર્ટમાં ચાલી જતા અદાલતે આરોપીને તકસીરવાન ઠરાવીને પાંચ વર્ષની સજા અને રૂપિયા 8000 નો દંડ ફટકાર્યો છે. તેમજ સગીરાને કોમ્પોન્સેશનમાંથી રૂપિયા બે લાખનું વળતર ચૂકવવા પણ આદેશ કર્યો છે.
