વિદ્યાનગર જીઆઈડીસી વિસ્તાર અને સંદેશર ગામથી
પોલીસ દ્વારા રૂ. 1.65 લાખની વધુની મત્તા જપ્ત કરીને કાર્યવાહી હાથ ધરવામાં આવી
વિદ્યાનગરના જીઆઇડીસી વિસ્તારમાં આવેલી એક કંપનીના ખાંચામાં બાઈક ઉપર બે શખ્સો પ્રતિબંધિત ચાઈનીઝ દોરી વેચવા માટે આવવાના હોવાની માહિતી વિદ્યાનગર પોલીસને મળી હતી. જેથી પોલીસની ટીમે જીઆઇડીસી વિસ્તારમાં વોચ ગોઠવી દીધી હતી. દરમિયાન એક બાઈક ઉપર બે શખ્સો કોથળો લઈને આવી ચડતા પોલીસે તેમને અટકાવી તપાસ કરતાં કોથળામાંથી ચાઈનીઝ દોરી ના કુલ ૯૬ નંગ ફીરકા મળી આવ્યા હતા. જેની અંદાજિત કિંમત રૂપિયા ૨૮,૮૦૦ જેટલી થાય છે. પોલીસે પકડાયેલ બંને શખ્સોના નામઠામ પૂછતા શખ્સોએ સંજય રામચંદ્ર તડવી (રહે. વિદ્યાનગર, જીઆઇડીસી) અને પ્રિતેશભાઈ શૈલેષભાઈ ભોઈ (રહે. બાંધણી) હોવાનું જણાવ્યું હતું. પોલીસે ચાઈનીઝ દોરી તથા બાઇક મળી કુલ રૂપિયા ૪૮,૮૦૦નો મુદ્દામાલ કબજે લઈ કાર્યવાહી ધરી હતી.
ત્યારબાદ પોલીસને માહિતી મળી હતી કે સંદેશર ગામે આવેલા ભંડાર નજીકના ખેતરમાં રહેતા અનિલ ઉર્ફે ઢોલો પૂનમભાઈ મકવાણા ચાઈનીઝ દોરીનો જથ્થો વેચાણ કરવા માટે ઉતાર્યો છે. જેથી પોલીસે બાતમી વાળા સ્થળે છાપો મારતા એક શખ્સ કાર્ટૂન સંતાડતો હોવાનું જોવા મળ્યું હતું. જોકે પોલીસને જોઈ તે ખેતરાડું રસ્તે ફરાર થઈ ગયો હતો પોલીસે તપાસ કરતાં ફરાર થઈ જનાર શખ્સ અનિલ ઉર્ફે ઢોલો મકવાણા હોવાનું જાણવા મળ્યું હતું. પોલીસે કાર્ટુનમાં તપાસ કરતા અંદરથી પ્રતિબંધિત ચાઈનીઝ દોરીના ૪૫૫ નંગ ફિરકાઓ મળી આવ્યા હતા.
જેની અંદાજિત કિંમત રૂપિયા ૧,૩૬,૫૦૦ જેટલી થાય છે. પોલીસે ચાઈનીઝ દોરીનો જથ્થો જપ્ત કરીને ફરાર થઈ ગયેલા અનિલ ઉર્ફે ઢોલો મકવાણાને ઝડપી પાડવાના ચક્રો ગતિમાન કર્યા હતા.
