હૃતિકની વોર ટુ ફલોપઃ તેલુગુ રાઈટ્સ લેનારને 22 કરોડનું વળતર અપાશે

- 400 કરોડના બજેટના 50 ટકા પણ ન નીકળ્યા 

- જુનિયર એનટીઆર પણ હોવાથી નાગા વામસીએ 120 કરોડમાં રાઈટ્સ લીધા હતા

મુંબઈ : હૃતિક રોશન અને જુનિયર એનટીઆરની ફિલ્મ 'વોર ટુ' ટિકિટબારી પર ફલોપ  થઈ છે. ૪૦૦ કરોડનાં બજેટમાં બનેલી આ ફિલ્મને ૨૦૦ કરોડની કમાણી માંડ  થઈ છે. આ સંજોગોમાં આ ફિલ્મને તેલુગુમાં રીલિઝ કરવાના રાઈટ્સ લેનારા નાગા વામસીને વળતર ચૂકવવું પડે  તેવી  હાલત સર્જાઈ છે.  આ ફિલ્મમાં જુનિયર એનટીઆર પણ હોવાથી  ફિલ્મ તેલુગુમાં મોટાપાયેલ હિટ થશે તેમ માની નાગા વામસીએ ૮૦ કરોડમાં ફિલ્મના રાઈટ્સ લીધા હોવાનું કહેવાય છે. અંદાજ એવો હતો કે ફિલ્મનું તેલુગુ વર્ઝન જ ૧૦૦  કરોડની કમાણી તો કરી જ લેશે. જોકે, આ ફિલ્મ બહુ નબળી હોવાના રિવ્યૂ અગાઉ જ આવી  ગયા હતા.  અધૂરામાં પૂરું આ ફિલ્મ ટિકિટબારી પર રજનીકાંતની 'કુલી' સાથે ટકરાઈ હતી. આ સંજોગોમાં ફિલ્મનાં તેલુગુ  વર્ઝનને ૫૦ કરોડની કમાણી પણ માંડ માંડ થઈ હોવાનું કહેવાય છે. 

આથી  ફિલ્મની નિર્માતા કંપની યશરાજ ફિલ્મ્સ હવે નાગા  વામસીને આ નુકસાન પેટે ૨૨ કરોડ રુપિયાનું વળતર ચૂકવવાની છે તેવી વાત સાઉથના ફિલ્મ વર્તુળોમાં ચર્ચાય છે.