જાતીય સતામણી મામલે બોલિવૂડ અભિનેતા વિજય રાજને ક્લીનચીટ, ક્રૂ મેમ્બરે લગાવ્યા હતા આરોપ

Actor Vijay Raaz harassment case: બોલિવૂડ અભિનેતા વિજય રાજનું નામ બધા જાણે છે. તે 'ભૂલ ભુલૈયા 3', 'ગલી બોય', 'સ્ત્રી' અને 'ગંગુબાઈ કાઠિયાવાડી' જેવી ઘણી સુપરહિટ ફિલ્મોમાં જોવા મળ્યો છે. સામાન્ય રીતે તે ઘણી ફિલ્મોમાં કોમિક ભૂમિકાઓ કરે છે. જોકે હવે તેને જાતીય સતામણીના કેસમાંથી મુક્ત કરવામાં આવ્યા છે.

આ પણ વાંચો: લાલચ, અહંકાર, ઈચ્છાઓ અને ભૂતકાળને ભૂલવાનો સ્ટાર સિંગરનો પ્રયાસ, છેવટે લીધો મહાદેવનો આશરો

જાતીય સતામણી કેસમાં વિજય રાજ નિર્દોષ જાહેર

વર્ષ 2020 માં અભિનેતા વિજય રાજ  વિદ્યા બાલન સ્ટારર ફિલ્મ 'શેરની' નો ભાગ હતો. આ સમય દરમિયાન સેટની એક મહિલા ક્રૂ મેમ્બર દ્વારા તેના પર જાતીય સતામણીનો આરોપ મૂકવામાં આવ્યો હતો. જોકે, હવે લગભગ 4 વર્ષ પછી મુંબઈની ગોંડિયા મેજિસ્ટ્રેટ કોર્ટે ટ્રાયલ પછી તેને આ કેસમાંથી મુક્ત કરી દીધા છે, અને તેની સામેના તમામ આરોપોને પણ ફગાવી દીધા છે.

શેરની ફિલ્મના શૂટિંગ વખતે બની હતી ઘટના 

લોકપ્રિય સેલિબ્રિટી વકીલ સવિના બેદી સચ્ચરે વિજયનો કેસ લડ્યો હતો. તેમણે જણાવ્યું કે, 'અભિનેતા વિજય નાગપુર શહેર નજીક તેમની ફિલ્મ 'શેરની' નું શૂટિંગ કરી રહ્યા હતા. આ સમય દરમિયાન, જ્યારે તેમની સામે કેસ દાખલ કરવામાં આવ્યો, ત્યારે તેને શૂટિંગ જ અધવચ્ચે છોડી દેવું પડ્યું હતું. તેમણે ઘણી ફિલ્મો અને પ્રોજેક્ટ્સ પણ ગુમાવ્યા. પરંતુ હવે તે નિર્દોષ સાબિત થયા છે.'

આ પણ વાંચો: જેકી અને અનિલ કપૂર ૩ દાયકા પછી શાહરુખની કિંગમાં સાથે દેખાશે

શું હતો આખો મામલો?

અભિનેતા વિજય રાજની 4 નવેમ્બર 2020 ના રોજ મધ્યપ્રદેશના બાલાઘાટથી ધરપકડ કરવામાં આવી હતી. ફિલ્મ 'શેરની'ની એક મહિલા ક્રૂ મેમ્બરે તેમના પર હોટલમાં છેડતી કરવાનો આરોપ લગાવ્યો હતો. પરંતુ અભિનેતાને તે જ દિવસે જામીન પર જેલમાંથી મુક્ત કરવામાં આવ્યો. પોલીસ  FIRમાં ઉલ્લેખ કરવામાં આવ્યો છે કે વિજય રાજે ફિલ્મ સેટ પર એક મહિલા ક્રૂ મેમ્બરના દેખાવ પર ટિપ્પણી કરી હતી અને તેની પરવાનગી વિના તેના ચહેરા પર માસ્ક લગાવવાનો પ્રયાસ કર્યો હતો. જે બાદ મહિલા ક્રૂ મેમ્બરે અભિનેતા વિશે ફરિયાદ કરવા માટે તેના વરિષ્ઠ અધિકારીઓનો પણ સંપર્ક કર્યો. જોકે, વિજય રાજ સામે જાતીય સતામણીનો કેસ દાખલ કરનારી મહિલાનું કેસ પૂર્ણ થાય તે પહેલાં જ મૃત્યુ થયું.