નેતા પાર્ટી બદલે એને કહેવાય અસલી વોટ ચોરી .

- અગડમ્ બગડમ્- બાબા આદમ

- સમજાવો, વોટ ચોરી એ પાપ છે કે સિદ્ધાંત

સીઆઈએ અધિકારી: વેલકમ યુ ઓલ. વિશ્વની સૌથી મોટી લોકશાહી ભારતમાં વોટ ચોરીનો મામલો સામે આવ્યો છે અને આપણે બધાએ ભેગા મળીને તેની તપાસ કરવાની છે. 

કેજીબી અધિકારી: હેં ? પણ ભારત પાસે ઈડી, સીબીઆઈ, રો સહિતની બાહોશ એજન્સીઓ છે તો પછી આપણા દ્વારા તપાસની જરુર શું પડી?

મોસાદ અધિકારી: ડિઅર, આપણા જેવી વિશ્વ મહાસત્તાઓનો ઊસુલ છે. કોઈ દેશ આપણને એના મામલામાં માથું મારવા બોલાવે કે ન  બોલાવે, આપણે ઝંપલાવી જ દેવાનું.

સીઆઈએ : અમારો  તો એવો નિયમ છે કે કોઈ દેશમા ંકોઈ મામલો ઉભો ન થતો હોય તો પહેલાં ઉભો કરવાનો અને પછી તેમાં ઝંપલાવી દેવાનું.

મોસાદ: અને આમ પણ ઈન્ડિયાની સીબીઆઈ અને ઈડી પાસે  પહેલેથી   વિપક્ષોનો બહુ વર્કલોડ છે. 

કેજીબી: અમારા જેવું જ રાખવુું જોઈએ. વિપક્ષ કેવો ને વાત કેવી. કોઈ વિપક્ષ-ફિપક્ષ જેવું દેખાય તો  પતાવી જ દેવાના. 

સીઆઈએ: ભારતમાં સિદ્ધાંત છે કે આપણે પાપને  મારવાનું છે, પાપીને નહિ. 

કેજીબી : પાપ? એ વળી શું?

મોસાદ :  સિદ્ધાંત? એ વળી શું?

સીઆઈએ: કહેવાનો મતલબ એ છે કે ભારતમાં  વિપક્ષના નેતાઓને પોતાની સાથે લઈને વિપક્ષને નાબૂદ કરવામાં આવે છે.  પછી એ નેતા પાપી નથી રહેતા પણ રાતોરાત સિદ્ધાંતવાદી બની જાય છે.

મોસાદ: બહુ અઘરું પેપર છે ભાઈ, જરા સિમ્પલ રીતે સમજાવો. 

સીઆઈએ: જુઓ, વોટ ચોરીનો  મહારાષ્ટ્રનો સાદો  દાખલો આપું. પહેલાં ત્યાંના મતદારો ભાજપ અને શિવસેનાને વોટ આપતા હતા અને એ બધા એનસીપી અને કોંગ્રેસની વિરુદ્ધ હતા.  પછી પરિસ્થિતિ એવી આવી કે ભાજપવાળાએ જ શિવસેનાના એ નેતાઓ વિરુદ્ધ મત આપવા પડયા જેની તરફેણમાં તેઓ આપતા હતા અને કોંગ્રેસ વાળાઓએ એ જ શિવસેના માટે મત આપવા પડયા જેની તેઓ એક સમયે વિરુદ્ધ હતા.  એનસીપીવાળાઓએ તેમના જેવી જ બીજી એનસીપીના નેતાઓ વિરુદ્ધ મત આપવા પડયા જે એક સમયે તેમની સાથે હતા. શિવસેનાવાળાઓએ....

કેજીબી: ભલા માણસ..હથોડો મારો માથે. પાર આવે. . 

સીઆઈએ: કાંઈ પાર આવે એમ નથી ભાઈ. ગુજરાતમાં કોંગ્રેસના ધારાસભ્ય હોય એ એનો વર્તમાન છે તો તેઓ ભાજપના ધારાસભ્ય હશે એ તેમનું ભવિષ્ય હશે. 

મોસાદ: શટ અપ..શટ અપ.વોટ ચોરીની તપાસની વાત કરો. 

સીઆઈએ: અરે યાર, તમે લોકો ન સમજ્યા. ભારતમાં નેતાઓ પાર્ટી બદલી નાખે છે એ જ અસલ વોટ ચોરી છે. પબ્લિકને ખબર જ નથી પડતી કે તેમણે પોતાનો મત કોને શા માટે આપ્યો હતો અનેે છેવટે એ મત ક્યાં ગયો.

ઈતિહાસમાં પહેલીવાર મોસાદ  અને કેજીબીવાળા હાથ મિલાવીને ભાગ્યા...

આદમનું અડપલું

આ ચોમાસામાં ક્યાંય ખાડો નડે એટલે સમજી લેવાનું કે તમે વોટ આપ્યો નથી પણ ખોટું બોલીને તમારી પાસેથી ચોરી લેવામાં આવ્યો છે.